د امریکا د مرکزي قوماندانۍ (سینټکام) ویلي، یو امریکایي سرتېری د شنبې په ورځ، د چنګاښ په ۲۷مه، د عراق په شمال کې د هغو ناچاودېدلو مهماتو د کنټرول شوې چاودنې پر مهال وژل شوی چې د امریکا په وینا د یوې راغورځول شوې بېپیلوټه الوتکې پاتې شوني وو او واشنګټن یې ایران ته منسوبوي.
سینټکام په اعلامیه کې ویلي، په دې پېښه کې یو بل امریکایي سرتېری هم سپک ټپي شوی او لا هم تر درملنې لاندې دی.
دغه قوماندانۍ همدارنګه اعلان کړی چې امریکایي ځواکونو د پراخو پلټنو وروسته د یکشنبې په ورځ په اردن کې د جولای د ۱۷مې د پوځي اډې د برید په سیمه کې نامعلوم انساني پاتې شوني موندلي دي. د سینټکام په وینا، د دغو پاتې شونو د هویت د تثبیت لپاره طبي معاینات او لابراتواري ازموینې روانې دي.
سینټکام تر دې مخکې ویلي وو چې په هغه برید کې، چې امریکا یې مسؤلیت ایران ته منسوبوي، دوه امریکایي سرتېري وژل شوي او یو بل ورک شوی دی. امریکایي چارواکو تر اوسه نه دي تایید کړي چې موندل شوي انساني پاتې شوني د هماغه ورک شوي سرتېري دي که نه.
سینټکام ټینګار کړی چې د وژل شویو او ورک شوي سرتېري هویت او نور جزییات به د هغوی د کورنیو د رسمي خبرولو تر بشپړېدو پورې نه خپرېږي.
ایران تر اوسه د سینټکام د دې تازه اعلامیې او د امریکا د ادعاوو په اړه کوم رسمي غبرګون نه دی ښودلی.
