د طالبانو د عامې روغتیا وزارت ویاند شرافت زمان ویلي، د روان میلادي کال له پیل راهیسې په افغانستان کې ۶۴۴ زره د پنځو کلونو څخه کمعمره ماشومان په موسمي ناروغیو اخته شوي دي. د هغه په وینا، زلزلو او سېلابونو ځپلو سیمو کې پاکو اوبو او کافي خوړو ته محدود لاسرسی د دغو ناروغیو د زیاتېدو له مهمو لاملونو څخه دی.
شرافت زمان د شنبې په ورځ، د چنګاښ په ۲۷مه، له ملي تلویزیون سره په خبرو کې وویل چې د هوا د تودوخې له زیاتېدو سره په ټول هېواد کې د موسمي ناروغیو پېښې هم ډېرې شوې او هره ورځ ګڼ ناروغان د درملنې لپاره روغتونونو ته مراجعه کوي.
ډاکټران وایي، پر روغتیايي مرکزونو فشار هم زیات شوی دی. د کابل د اندرا ګاندي روغتون ډاکټر محمد عارف حسنزی ویلي چې هره ورځ شاوخوا ۲۰۰ ماشومان، چې په موسمي ناروغیو اخته وي، دې روغتون ته لېږدول کېږي او د ناروغۍ د شدت له مخې ورته درملنه برابریږي. هغه له کورنیو غوښتي چې پاکې اوبه وڅښي او روغتیایي اصول مراعات کړي.
بل لور ته، په کابل کې د یوه خصوصي روغتون ډاکټر سعیدالله افغانستان انټرنشنل ته ویلي چې دولتي روغتونونه د درملنې له امکاناتو او تجهیزاتو له جدي کمښت سره مخ دي او په ځانګړي ډول د ماشومانو د درملنې اړتیاوو ته بشپړ ځواب نه شي ورکولای. د هغه په وینا، د پاکو اوبو کمښت، د برېښنا پرلهپسې پرې کېدل او د نسناستې په څېر ناروغیو زیاتوالی د سختې ګرمۍ له مهمو پایلو څخه دي. نوموړي ادعا کړې چې خلک د وېرې له امله خپلې ستونزې په ښکاره نه شي بیانولای.
په همدې حال کې، د روغتیا نړیوال سازمان هم د افغانستان د ګرمۍ د څپې په اړه خبرداری ورکړی او له خلکو یې غوښتي چې د ورځې په ګرمو ساعتونو کې له درنو فعالیتونو ډډه وکړي، په سیورو ځایونو کې پاتې شي، خپل بدن یخ وساتي او په کافي اندازه اوبه وڅښي.
