جرمني رسنیو راپور ورکړی چې د راینلنډ-فالتس ایالت د ټریر پوهنتون ته نږدې د چړې په برید کې یو ۲۲ کلن جرمن محصل وژل شوی او پولیسو د دې پېښې په تړاو یو افغان پناهغوښتونکی نیولی دی.
د راپورونو له مخې، دا پېښه د چهارشنبې په ورځ، د چنګاښ په ۲۴مه، د رابرت شومانآله په سړک کې، د ټریر پوهنتون څخه څو سوه متره لرې رامنځته شوې ده. عیني شاهدانو بیړنیو خدماتو ته زنګ وهلی او ویلي یې وو چې یو کس د چړې برید کړی او وروسته له سیمې تښتېدلی دی.
پولیسو د پېښې له رامنځته کېدو لږ وروسته شکمن کس ونیو. د راپورونو له مخې، نیول شوی کس یو افغان پناهغوښتونکی او د ټریر ښار اوسېدونکی دی.
د ژغورنې ډلې هڅه وکړه ټپي محصل روغتون ته په بیړني ډول ولېږدوي، خو نوموړي د سختو ټپونو له امله خپل ژوند له لاسه ورکړ.
د جرمني رسنیو د معلوماتو له مخې، د وژنې د قضیو ځانګړې څانګه د برید د څرنګوالي، احتمالي انګېزې او کارول شوې وسلې په اړه خپلې پلټنې روانې ساتلې دي. پولیسو تر اوسه د برید د انګېزې په اړه کوم رسمي معلومات نه دي خپاره کړي.
ټریر پوهنتون په خپره کړې اعلامیه کې د وژل شوي محصل له کورنۍ سره خواخوږي څرګنده کړې او ویلي یې دي چې دا پېښه یې ټوله پوهنتوني ټولنه ژور غم ته وړې ده.
د جرمني د مسیحي دموکرات ګوند (CDU) د ځوانانو څانګې هم په ټریر ښار کې د یوې اعلامیې په خپرولو سره دا برید غندلی او د تاوتریخوالي د مخنیوي لپاره یې د لا زیاتو امنیتي اقداماتو غوښتنه کړې ده.
