په غور ولایت کې باوري سرچینو نیمروز ټلوېزیون ته ویلي چې د طالبانو استخباراتو په تېرو دوو ورځو کې لږ تر لږه ۱۳ کسان د فیروزکوه ښار او شاوخوا سیمو کې د امرالله صالح په مشرۍ د «شن بهیر» سره د همکارۍ په تور نیولي دي.
د سرچینو په وینا، یو شمېر نیول شوي کسان د اتوس سفلا کلي له خپلو کورونو او یو شمېر نور د فیروزکوه ښار له خپلو کاري ځایونو څخه د طالبانو د استخباراتو ځواکونو نیولي دي. سرچینې وایي، طالبانو د پوځي موټرو په وسیله د دغو کسانو استوګنځایونو ته ورغلي او وروسته یې نامعلوم ځای ته انتقال کړي دي.
شن بهیر هم په یوه خبرپاڼه کې ویلي چې د طالبانو استخباراتو په غور، په ځانګړي ډول فیروزکوه کې، «لسګونه ځوانان» د دې بهیر سره د احتمالي همکارۍ په شک نیولي او د هغوی د جسمي او رواني شکنجې په اړه یې اندېښنه ښودلې ده. خو دې بهیر په مشخص ډول د نیول شویو کسانو غړیتوب نه دی تایید کړی.
د سرچینو د معلوماتو له مخې، دا نیونې وروسته له هغې ترسره شوې چې د دولتیار ولسوالۍ په یوه طالب پوسته د شن بهیر له لوري د راکټي برید ادعا وشوه. سرچینې وایي، د برید عاملان له سیمې تښتېدلي، خو طالبانو وروسته د دې بهیر یو شمېر پخواني غړي او پلویان نیولي دي.
سرچینې زیاتوي، شاوخوا ۲۰ تنه قومي مشران او سیمهییز مخور د چهارشنبې په ورځ د طالبانو د والي دفتر ته ورغلي او د نیول شویو کسانو د خوشې کېدو غوښتنه یې کړې، خو د طالبانو سیمهییزو چارواکو ویلي چې په دې اړه معلومات نه لري.
د یوې ځايي سرچینې په وینا، لږ تر لږه درې تنه نیول شوي کسان د پخواني حکومت د کرنې او مالدارۍ، کار او ټولنیزو چارو او ملي بانک پخواني کارکوونکي وو.
طالبانو تر اوسه د دغو نیونو په اړه رسمي څرګندونې نه دي کړې. د نیول شویو کسانو کورنۍ هم وایي، د خپلو خپلوانو د ساتنې ځای او وضعیت په اړه هېڅ معلومات نه لري.
