د کښتۍ چلونې معلومات ښيي چې د یکشنبې په ورځ، د چنګاښ په ۲۱مه، د هرمز تنګي له لارې د تېرېدونکو بېړیو شمېر د تېرو پنځو اوونیو تر ټولو ټیټې کچې ته راښکته شوی دی. دا وضعیت په داسې حال کې رامنځته شوی چې د امریکا او ایران ترمنځ پوځي ترینګلتیا زیاته شوې او د نړیوالې کښتۍ چلونې د امنیت په اړه اندېښنې هم ورسره ډېرې شوې دي.
رویټرز د «کپلر» شرکت د معلوماتو له مخې راپور ورکړی چې په یاده ورځ یوازې شپږ بېړۍ د هرمز تنګي له لارې تېرې شوې، چې دا په تېرو پنځو اوونیو کې تر ټولو ټیټه ثبت شوې کچه ده.
د تېرېدونکو نفتلېږدوونکو بېړیو له ډلې، «هیومنیټي» ستر نفتټانکر، چې دوه میلیونه بېرله ایراني نفت یې لېږدول، او «کاپتان اندریاس» بېړۍ، چې شاوخوا ۵۰۰ زره بېرله د کویټ نفتي محصولات یې انتقالول، لیدل شوي دي. همدارنګه درې تش نفتټانکرونه د بارولو لپاره خلیج فارس ته ننوتلي دي.
د تعقیبي معلوماتو له مخې، ګڼو نفتټانکرونو د هرمز تنګي د تېرېدو پر مهال خپلې د پېژندنې برېښنايي دستګاوې بندې کړې وې. همدارنګه د اونۍ په پای کې د مایع طبیعي ګاز هېڅ باروونکې بېړۍ د دې سمندري لارې د ننوتلو په لوري نه ده ثبت شوې.
دا پرمختګونه وروسته له هغې دي چې د امریکا مرکزي قوماندانۍ (سینټکام) اعلان وکړ، په ایران کې یې د هغو هدفونو پر ضد د بریدونو نوې لړۍ ترسره کړې چې د واشنګټن په وینا د سوداګریزو بېړیو پر وړاندې د احتمالي بریدونو وړتیا کموي.
په مقابل کې، د ایران سپاه پاسداران ویلي چې د دې ځواک سمندري قطعې د هرمز تنګي په سیمه کې دوه بېړۍ د هغو د برېښنايي پېژندنې د سیسټمونو له بندېدو وروسته درولې دي، خو د دغو بېړیو نومونه یې نه دي خپاره کړي.
د امریکا او ایران د دواړو لورو ادعاوې په خپلواکه توګه نه دي تایید شوې. خو د پوځي کړکېچ دوام د نړۍ د انرژۍ د یوې تر ټولو مهمې سمندري لارې د امنیت په اړه اندېښنې لا زیاتې کړې دي.
