د اسلامي همکاریو سازمان د ښځو چارو وزیرانو د نهمې غونډې پر مهال د افغانستان ملي بیرغ د نورو غړو هېوادونو د بیرغونو تر څنګ نندارې ته وړاندې شو. دغه دوه ورځنۍ غونډه د یکشنبې په ورځ، د چنګاښ په ۲۱مه، د پاکستان په پلازمېنه اسلاماباد کې د شاوخوا ۱۹۰ استازو په ګډون پیل شوه.
په دې غونډه کې د طالبانو د حکومت هېڅ استازی ګډون نه لري، او تر اوسه د اسلامي همکاریو سازمان هېڅ غړي هېواد هم د طالبانو حکومت په رسمیت نه دی پېژندلی.
د سرچینو په وینا، د غونډې تنظیموونکو له طالبانو غوښتي وو چې د ګډون لپاره یوه ښځینه استازې معرفي کړي، خو د طالبانو په حکومتي جوړښت کې د ښځو د نه حضور له امله، دې ډلې ونه توانېده چې کومه ښځینه استازې غونډې ته واستوي.
د ګډونوالو د پلاوو ترکیب ښيي چې د اسلامي همکاریو سازمان د ډېری غړو هېوادونو له لوري د حکومتونو لوړپوړې ښځینه چارواکې، د ولسمشر مرستیالانې، وزیرانې او نورې لوړرتبه استازې په دې غونډه کې ګډون لري.
د افغانستان د ښځو وضعیت د دې غونډې له مهمو موضوعاتو څخه دی. طالبانو له بیا واکمنېدو وروسته د شپږم ټولګي څخه پورته د نجونو زدهکړې، د ښځو پوهنتوني زدهکړې او په ګڼو برخو کې د هغوی کار منع کړی دی.
طالبان وایي، دغه محدودیتونه د اسلامي شریعت د دوی د تفسیر پر بنسټ وضع شوي دي. خو اسلامي همکاریو سازمان او د دې سازمان ګڼو غړو هېوادونو په تېرو کلونو کې څو ځله له طالبانو غوښتي چې د افغان ښځو پر زدهکړو او کار لګېدلي محدودیتونه لغوه کړي.
