د اسلامي همکاریو سازمان د غړو هېوادونو د ښځو چارو وزیرانو نهمه دوه ورځنۍ غونډه د یکشنبې په ورځ، د چنګاښ په ۲۱مه، د پاکستان په پلازمېنه اسلاماباد کې پیل شوه.
د غونډې د رسمي اجنډا له مخې، ګډونوال به د افغانستان د وضعیت، په ځانګړي ډول د ښځو او نجونو پر زدهکړو لګېدلو محدودیتونو، په اړه هم بحث او د نظر تبادله وکړي.
دغه غونډه د «د اسلامي همکاریو سازمان په غړو هېوادونو کې د ښځو ټولنیز، اقتصادي او سیاسي پیاوړتیا؛ ننګونې او راتلونکې لارې» تر سرلیک لاندې جوړه شوې او شاوخوا ۱۹۰ استازي د اسلامي همکاریو سازمان د ۵۷ غړو هېوادونو څخه پکې برخه اخلي.
تر اوسه د غونډې تنظیموونکو نه دي ویلي چې د افغانستان د ښځو په استازیتوب به څوک په دې غونډه کې وینا وکړي.
خو د غونډې د تنظیموونکي ټیم یوې سرچینې تر دې وړاندې ویلي وو چې یو شمېر افغان ښځو ته د ګډون بلنه ورکړل شوې، خو د بلنلیکونو له لېږلو سره سره، د هغوی د ګډون احتمال «ډېر کم» بلل شوی دی.
دا غونډه په داسې حال کې ترسره کېږي چې طالبان لا هم د افغانستان پر ښځو او نجونو د زدهکړو، کار او ټولنیز حضور پراخ محدودیتونه لګولي دي. دغه موضوع په وروستیو کلونو کې د اسلامي هېوادونو د افغانستان اړوند بحثونو له مهمو محورونو څخه ګرځېدلې ده.
