د ایران د سمندري ځواکونو قوماندان شهرام ایراني د پخواني رهبر علي خامنهيي د جنازې په مراسمو کې د وینا پر مهال ویلي، هغه کسان چې د ایران د مخالفینو په توګه یادېږي باید ځانونه د «مسلمانو جنګیالیو» له غبرګون سره مخامخ کېدو ته چمتو کړي؛ هغه کسان چې د نوموړي په وینا د خپلو وژل شویو کسانو د «غچ اخیستو» هوډ لري.
ایراني زیاته کړه چې د ایران دښمنان به له «سختې څپېړې او کوبنده ګوزار» سره مخ شي، داسې ګوزار چې د هغه په خبره «د هغوی څېرې به ماتې کړي». خو نوموړي ونه ویل چې دا څرګندونې کوم هېواد یا لوري ته متوجه دي او نه یې د احتمالي اقدام د وخت یا څرنګوالي په اړه نور جزئیات وړاندې کړل.
دا څرګندونې په داسې وخت کې کېږي چې سیمه لا هم د وروستیو امنیتي او پوځي کړکېچونو تر اغېز لاندې ده او د ایران او ځینو لوېدیځو او سیمهییزو هېوادونو ترمنځ اړیکې لا هم له لوړې ترینګلتیا سره مخ دي.
شهرام ایراني دا خبرې د علي خامنهيي د جنازې په مراسمو کې وکړې؛ هغه مراسم چې د ایران د پوځ او حکومت ګڼو لوړپوړو چارواکو هم پکې ګډون کړی و. په ورته مراسمو کې د ایران چارواکي معمولاً د هېواد پر دفاعي تګلارې، پوځي چمتووالي او د بهرنیو ګواښونو پر وړاندې د مقاومت پر دوام ټینګار کوي.
د ایراني وروستۍ څرګندونې د ایران د بازدارندګۍ د سیاست د یوې برخې په توګه ارزول کېږي، خو تر اوسه هېڅ هغه هېواد چې ښایي د دغو خبرو احتمالي مخاطب وي، رسمي غبرګون نه دی ښودلی. له همدې امله، د دې څرګندونو عملي اغېزې به تر ډېره د راتلونکو سیمهییزو تحولاتو او د تهران د راتلونکو اقداماتو له څرنګوالي سره تړلې وي.
