د امریکا د ولسمشر مرستیال جيډي ونس د ایران په اړه د ډونالډ ټرمپ له سیاست څخه دفاع کړې او ویلي یې دي چې پوځي بریدونه باید یوازې هغه وخت ترسره شي چې یو روښانه او مشخص هدف ولري.
ونس په یوه ټلوېزیوني پروګرام کې د هغو کسانو په انتقاد کې چې پر ایران د لا ډېرو بریدونو غوښتنه کوي، وویل: «د هغوی لیدلوری دا دی چې یوازې بمبار وکړئ، بیا هم بمبار وکړئ؛ خو په رښتیا نه شي تشریح کولای چې د دې کار وروستی هدف څه دی.»
هغه زیاته کړه: «ولسمشر چمتو دی چې د اړتیا په صورت کې د هوايي بریدونو امر ورکړي، خو یوازې هغه وخت چې دا اقدام د یوه مشخص هدف د ترلاسه کولو لپاره وي.»
د امریکا مرستیال ولسمشر د ایران سره د روانو خبرو په اړه هم وویل: «یو له هغو موضوعاتو چې زما لپاره هم په زړه پورې او هم ځوروونکې ده، دا ده چې ایرانیان وایي د سولې هېڅ خبرې نه روانې دي، خو په عین وخت کې د واشنګټن او تهران ترمنځ د سولې د هوکړې په اړه تخنیکي خبرې دوام لري.»
ونس دغه وضعیت «د مذاکرې تاکتیک یا ایراني شگرد» وباله او ویې ویل چې د دې چلند درک کول ورته ستونزمن دي.
