د اسرائیل لومړي وزیر بنیامین نتانیاهو د خپل هېواد د پوځ د افسرانو د فراغت په مراسمو کې ویلي چې اسرائیل لا هم د ایران او حماس پر وړاندې مهم امنیتي او پوځي مأموریتونه لري او روان عملیات یې پای ته نه دي رسېدلي.
هغه ټینګار وکړ چې اسرائیل به «تر هر هغه وخته چې اړتیا وي» د سویلي لبنان په امنیتي سیمه کې خپل پوځي حضور وساتي او دا یې د خپل هېواد د امنیتي ستراتیژۍ مهمه برخه وبلله.
نتانیاهو وویل چې د جګړې پر مهال له کورنیو او نړیوالو فشارونو سره مخ شوی و څو پوځي عملیات ودروي، خو د ده په وینا، دغو غوښتنو ته یې غاړه کېنښوده.
هغه زیاته کړه: «ما وویل، که اړتیا وي، حتی په خپلو نوکانو به هم جګړه وکړو.»
د اسرائیل لومړي وزیر دا ادعا هم وکړه چې هېواد یې «د منځني ختیځ څېره بدله کړې ده» او ویې ویل: «هیچا باور نه کاوه چې یوه ورځ به د ایران اسمان ته ورسېږو.»
هغه زیاته کړه چې د ده په وینا «د وېرې دیوال مات شوی» او اسرائیل اوس د دفاعي غبرګون پر ځای د پوځي عملیاتو ابتکار په خپل لاس کې لري.
د نتانیاهو دغه څرګندونې داسې مهال کېږي چې د اسرائیل، ایران، حماس او د ایران د متحدو ډلو ترمنځ امنیتي کړکېچونه لا هم دوام لري او د سیمې د اوربندونو او امنیتي ترتیباتو راتلونکی له ناڅرګندتیا سره مخ دی.
