د بېساري تودوخې څپه لا هم د اروپا پراخې سیمې تر خپل اغېز لاندې ساتلې او پارکونه او شنې سیمې د لوړو تودوخو څخه د خلکو د ژغورنې لپاره په مهمو پناهځایونو بدل شوي دي.
د اقلیمي معلوماتو او وړاندوینو له مخې، اروپا د نړۍ د اوسط په پرتله په چټکۍ سره تودېږي او د اقلیم بدلون اغېزې په دې وچه کې تر بل هر وخت ډېرې څرګندې شوې دي.
په ډېرو اروپايي هېوادونو کې، چې ښاري زېربناوې یې د دومره لوړو تودوخو لپاره نه دي جوړې شوې، خلک د ورځې تر ټولو ګرم ساعتونه د پارکونو، باغونو او د ونو تر سیورو لاندې تېروي.
دا شنې سیمې یوازې د انسانانو لپاره نه، بلکې د مرغانو او نورو ژوو لپاره هم د خوندي پناهځایونو په توګه کار کوي.
د نن ورځې انځور د لندن ښار له یوه پارک څخه اخیستل شوی، چې پکې لیدل کېږي انسان او طبیعت دواړه د بېساري ګرمۍ له امله د ونو سیوري ته پناه وړې ده.
