هانا نیومن، د اروپا پارلمان غړې، بروکسل ته د طالبانو د پلاوي سفر او د افغان کډوالو په اړه خبرې اترې په سختو ټکو وغندلې او دا یې «یوه مضحکه ننداره» وبلله.
نیومن وویل طالبان یوازې د تخنیکي خبرو لپاره اروپا ته نه دي راغلي، بلکې د دې ډلې اصلي هدف سیاسي مشروعیت ترلاسه کول او له اروپايي هېوادونو سره د اړیکو پراخول دي.
هغې ټینګار وکړ چې طالبانو له آلمان سره د اړیکو له پراختیا وروسته په تدریجي ډول د اروپا له نورو هېوادونو او بنسټونو سره هم خپلې اړیکې پراخې کړې دي.
د اروپا پارلمان دې غړې وویل چې آلماني چارواکو له طالبانو سره اړیکې د افغان کډوالو د بېرته ستنولو او قونسلي همکاریو تر عنوان لاندې توجیه کړې، خو وروسته د طالبانو ډیپلوماتان په برلین کې ومنل شول.
د نیومن په وینا، طالبان اوس هڅه کوي چې د افغانستان نورې قونسلګرۍ هم تر خپل کنټرول لاندې راولي.
هغې خبرداری ورکړ چې د ډیپلوماتیکو استازولیو سپارل به طالبانو ته د هغو زرګونو افغانانو شخصي معلوماتو ته لاسرسی ورکړي چې په اروپا کې ژوند کوي او ډېری یې د طالبانو له واکمنۍ تښتېدلي دي.
اروپايي کمېسیون مخکې ویلي وو چې د طالبانو د پلاوي سفر یوازې پر قونسلي او تخنیکي موضوعاتو متمرکز دی او د اقامت د حق نه لرونکو افغان کډوالو د بېرته ستنولو موضوع پکې تر بحث لاندې ده.
د رویټرز له خوا لیدل شوي سند له مخې، د خبرو اصلي محور د هغو افغان اتباعو بېرته منل او ستنول دي چې په اروپايي ټولنه کې د پاتې کېدو قانوني حق نه لري.
په همدې حال کې یوې سرچینې افغانستان انټرنشنل ته ویلي چې د اروپايي ټولنې د ۱۵ غړو هېوادونو استازو هم په دې غونډه کې ګډون کړی دی.
بروکسل ته د طالبانو د پلاوي بلنه په وروستیو ورځو کې د بشري حقونو فعالانو، د ښځو د حقونو مدافع بنسټونو او یو شمېر اروپايي سیاستوالو له سختو نیوکو سره مخ شوې ده.
