د پاکستان پولیسو یو سړی نیولی چې تور پرې دی خپله مېرمن او ماشومان یې د لسو کلونو څخه زیات وخت لپاره په کور کې بند ساتلي او له فزیکي او رواني ځورونې سره یې مخ کړي دي.
د بيبيسي اردو د راپور له مخې، ۵۴ کلنې فرانسوۍ مېرمنې سیلوي یاسمینا ویلي چې مېړه یې په دوامداره توګه د کورنۍ غړي وهل ټکول او رواني فشارونه یې پرې راوستل.
پولیس وایي دا قضیه هغه مهال افشا شوه چې د کورنۍ له زامنو څخه یو وتوانېد له کوره وتښتي او امنیتي ځواکونو ته خبر ورکړي.
له راپور وروسته پولیسو د خیبرپښتونخوا ایالت په یوه لیرې پرته سیمه کې پر کور چاپه ووهله او مېرمنه او پنځه ماشومان یې په یوه کوچنۍ خونه کې وموندل.
چارواکو ویلي چې د کورنۍ د غړو پر بدنونو د وهلو او ټپي کېدو نښې لیدل شوې دي.
ژغورل شوې مېرمن او ماشومان وروسته په پېښور کې د ښځو د ملاتړ یوه مرکز ته انتقال شول او د هغوی د بېرته ستنېدو د امکاناتو ارزونه روانه ده.
سیلوي یاسمینا ویلي چې کورنۍ یې په ۲۰۱۴ کال کې له استرالیا څخه پاکستان ته کډه شوې وه، خو له هغه وخت راهیسې یې له بهرنۍ نړۍ سره اړیکې نه لرلې او د نورو خلکو د لیدو اجازه هم نه ورکول کېده.
د پولیسو په وینا، د کورنۍ دوه لوی ماشومان له زدهکړو محروم پاتې شوي وو، او درې نور کوچني ماشومان چې په پاکستان کې زېږېدلي، هېڅکله په ښوونځي یا کوم تعلیمي مرکز کې نه وو شامل شوي.
پاکستاني پولیسو د نیول شوي کس هویت نه دی خپور کړی او وایي چې د قضیې پلټنې لا هم دوام لري.
