څلورو هندي سرچینو رویټرز خبري اژانس ته ویلي چې هند او متحده عربي امارات د هند د ځینو پرمختللو دفاعي سیسټمونو د پلور په اړه خبرې کوي.
د سرچینو په وینا، په دغو خبرو کې د «براهموس» مافوقالصوت کروز توغندي او د «آکاشتیر» هوايي دفاعي سیسټم په ګډون څو مهم دفاعي تجهیزات شامل دي.
یوې باخبره سرچینې ویلي چې اماراتو د هند د بېلابېلو پوځي سیسټمونو په اړه خپله لېوالتیا څرګنده کړې او که څه هم خبرې لا هم په لومړنیو پړاوونو کې دي، خو پرمختګ یې په چټکۍ روان دی.
براهموس توغندی چې د هند او روسیې له خوا په ګډه جوړ شوی، د نړۍ له چټکو کروز توغندیو څخه شمېرل کېږي او له وچې، سمندر او هوا څخه د توغولو وړتیا لري. آکاشتیر بیا یو اتومات هوايي دفاعي سیسټم دی چې د هند د دفاعي صنعت له خوا طرحه شوی دی.
هندي سرچینې وایي امارات د ایران سره د وروستۍ جګړې وروسته د خپل دفاعي ظرفیت د پیاوړتیا لپاره د پرمختللو پوځي تجهیزاتو د پېرلو ارزونه کوي. د هرمز تنګي او د انرژۍ د صادراتو د مهمو لارو ساتنه هم د دغې تګلارې له مهمو دلیلونو څخه بلل شوې ده.
د راپور له مخې، اماراتو ته د براهموس توغندي هر ډول پلور د روسیې تأیید ته اړتیا لري، خو سرچینې باور لري چې د مسکو او ابوظبۍ نږدې اړیکې به په دې برخه کې جدي خنډ رامنځته نه کړي.
د هند او اماراتو اړیکې په وروستیو کلونو کې د سوداګرۍ، انرژۍ او دفاعي همکاریو په برخو کې د پام وړ پراخې شوې دي. هندي چارواکي دغه مذاکرات د سیمې د نویو جیوپولیټیکي بدلونونو برخه او د وسلو په نړیوال بازار کې د هند د مخ پر زیاتېدونکي رول نښه بولي.
د هند د رسمي شمېرو له مخې، د ۲۰۲۶ کال تر مارچ پورې د دغه هېواد دفاعي صادرات له څلورو میلیارده ډالرو اوښتي دي، په داسې حال کې چې شاوخوا یوه لسیزه وړاندې دا کچه یوازې څو میلیونه ډالره وه.
سره له دې، هند لا هم د نړۍ له سترو وسلو واردوونکو هېوادونو څخه ګڼل کېږي او د نړیوالو وسلو په وارداتو کې د پام وړ ونډه لري.
