د سکاټلنډ پولیسو اعلان کړی چې یو ۳۶ کلن سړی یې د اډینبرو ښار د وروستیو تاوتریخجنو بریدونو په تړاو تورن کړی او دوسیه یې د نورو حقوقي اقداماتو لپاره څارنوالۍ ته استولې ده.
د پولیسو په وینا، دغه بریدونه د جوزا په ۲۹مه، د جمعې په ورځ ترسره شوي چې په پایله کې یې پنځه نارینه ټپیان شوي دي. درې ټپیان د غیر وژونکو ټپونو د درملنې لپاره روغتون ته انتقال شوي دي.
په ټولنیزو شبکو کې خپرو شویو ویډیوګانو کې یو نیمه لوڅ او خالکوبی شوی سړی لیدل کېږي چې ظاهراً له یوې لویې وسلې سره یو آسیایي الاصله کس تعقیبوي. وروسته هغه هڅه کوي یوه رستورانت ته ننوځي، خو د پولیسو له خوا نیول کېږي.
د بي بي سي د راپور له مخې، پېښه ښایي د اډینبرو ښار لوېدیځ لور ته د یوه جومات په شاوخوا کې پیل شوې وي او وروسته د ښار نورو سیمو ته غځېدلې وي.
د بریتانیا لومړي وزیر ویلي چې بریدګر ښایي د مسلمانانو پر ضد د کرکې له انګېزې دغه عمل ترسره کړی وي.
د بریتانیا د مسلمانانو شورا دغه بریدونه غندلي او ویلي یې دي چې دا ډول پېښې په داسې فضا کې رامنځته کېږي چې مسلمانان او کډوال د کرکجنو څرګندونو هدف ګرځي.
د سکاټلنډ د جوماتونو ټولنې هم خبرداری ورکړی چې د کډوالو، پناه غوښتونکو او مسلمانانو د ګواښ په توګه معرفي کول کولی شي د نفرت پر بنسټ د تاوتریخوالي پېښې زیاتې کړي.
دا پېښه په داسې حال کې رامنځته شوې چې بریتانیا په وروستیو میاشتو کې د کډوالۍ او مهاجرت په تړاو د سیاسي او ټولنیزو کړکېچونو شاهده پاتې شوې ده. بریتانوي چارواکو مخکې ځینې د مهاجرینو ضد ګډوډۍ «توکمپاله اوباشي» بللې وې.
