اسماعیل بقایي، د ایران د بهرنیو چارو وزارت ویاند، اعلان کړی چې د تهران او واشنګټن ترمنځ د تفاهملیک له لاسلیک وروسته به د دواړو هېوادونو ترمنځ د مذاکراتو نوی پړاو پیل شي.
بقایي د پنجشنبې په ورځ، د غبرګولي ۲۸مه، وویل چې د تفاهملیک متن په فارسي او انګلیسي ژبو د دواړو هېوادونو د لوړپوړو چارواکو له خوا لاسلیک شوی دی.
هغه د دې سند د لاسلیک د څرنګوالي په اړه وویل چې په پیل کې ټاکل شوې وه سند په سوئیس کې د حضوري غونډې پر مهال لاسلیک شي، خو د دواړو لورو تر سلا مشورو وروسته پرېکړه وشوه چې د دواړو هېوادونو ولسمشران به یې په مجازي ډول لاسلیک کړي.
د ایران د بهرنیو چارو وزارت ویاند وویل چې د دې پرېکړې یو مهم دلیل دا و چې د راتلونکي هر احتمالي سرغړونې سیاسي لګښت لوړ شي او دواړه لوري د خپلو ژمنو پر عملي کولو لا زیات مکلف پاتې شي.
بقایي همدارنګه ټینګار وکړ چې په سوئیس کې پلان شوې غونډه لا هم پر خپل ځای پاتې ده، خو د هغې د وروستیو جزییاتو په اړه به د منځګړو هېوادونو سره تر سلا مشورو وروسته پرېکړه وشي.
هغه زیاته کړه چې د تفاهملیک له لاسلیک وروسته به د مذاکراتو راتلونکی پړاو پیل شي او بحثونه به د عملي میکانیزمونو، اجرايي جزییاتو او وروستۍ موافقې ته د رسېدو پر لارې متمرکز وي.
دا څرګندونې په داسې حال کې کېږي چې مخکې ویل شوي وو تفاهملیک به د جمعې په ورځ، د غبرګولي په ۲۹مه، په سوئیس کې لاسلیک شي، خو د اعلانونو له مخې دا بهیر تر ټاکل شوي مهاله وړاندې بشپړ شو.
په ورته وخت کې، سوئیسي چارواکو اعلان کړی چې د ایران او امریکا د پلاوو رسمي غونډه به د پلان له مخې ترسره شي او د دواړو هېوادونو استازي د خبرو اترو لپاره سوئیس ته روان شوي دي.
د سوئیس د بهرنیو چارو وزارت ټینګار کړی چې د مذاکراتو اجنډا، محتوا او د ناستې د ترسره کېدو څرنګوالی به د مذاکره کوونکو لورو له خوا ټاکل کېږي.
د نیمروز له نظره، د تفاهملیک لاسلیک د اوږدې سیاسي کړکېچ د پای مانا نه لري، بلکې د یوه نوي او حساسې مرحلې پیل دی. د راتلونکو تخنیکي او سیاسي مذاکراتو پایلې به وښيي چې ایا دا تفاهم په یوه دوامدار او هر اړخیز توافق بدلېدای شي که نه.
