خالد حنفي، د طالبانو د امر بالمعروف او نهی عن المنکر وزیر، په کابل کې د دې ډلې د محتسبانو د درې ورځني روزنیز او اصلاحي سمینار پر مهال ویلي چې نړیواله ټولنه د افغانستان په کورنیو چارو کې د مداخلې حق نه لري او د ټولنې «معنوي اصلاح» د ده د وزارت او محتسبانو اساسي مسئولیت دی.
د طالبانو د امر بالمعروف وزارت د پنجشنبې په ورځ، د غبرګولي ۲۸مه، د حنفي د وینا برخې خپرې کړې. نوموړي ادعا وکړه چې د طالبانو له بیا واکمنېدو وروسته هغه اختلافات له منځه تللي چې د ده په وینا «د دین د دښمنانو» له خوا د افغانانو ترمنځ رامنځته شوي وو.
حنفي وویل چې د طالبانو مخالفان او هغه کسان چې نوموړي «د اسلام بدخواهان» وبلل، د دې ډلې د یووالي او انسجام پر وړاندې ناکام شوي دي.
د طالبانو د امر بالمعروف وزیر محتسبانو ته په خطاب کې وویل چې په ټولنه کې د دیني ارزښتونو خپرول د دوی رسمي او شرعي دنده ده او باید په پوره ژمنتیا خپلو مسئولیتونو ته دوام ورکړي.
هغه د امر بالمعروف او نهی عن المنکر د قانون پر بشپړ تطبیق ټینګار وکړ او له محتسبانو یې وغوښتل چې د خپلو دعوتي او نظارتي فعالیتونو پر مهال له زغم او حوصلې څخه کار واخلي. د نوموړي په وینا، محتسبان باید تر هر څه وړاندې د دیني احکامو او اسلامي لارښوونو په اړه بشپړه پوهه ولري.
دا څرګندونې داسې مهال مطرح کېږي چې د طالبانو د امر بالمعروف وزارت ۵۵۰ محتسبان له ۳۴ ولایتونو څخه کابل ته د روزنیز سمینار لپاره وربللي دي.
په ورته وخت کې، د دې وزارت د فعالیتونو په اړه کورني او نړیوال انتقادونه زیات شوي دي. د بشري حقونو سازمانونو او نړیوالو بنسټونو په وار وار له طالبانو غوښتي چې پر ښځو لګېدلي محدودیتونه لرې کړي او د افغانستان نړیوالو ژمنو ته درناوی وکړي.
دغه انتقادونه په ځانګړي ډول وروسته له هغې زیات شول چې په هرات کې د ښځو د نیولو او د اعتراضونو د ځپلو راپورونه خپاره شول. خو خالد حنفي په خپلو وروستیو څرګندونو کې د هرات وروستیو پېښو او د محتسبانو پر کړنو شویو نیوکو ته اشاره ونه کړه.
د طالبانو د امر بالمعروف قانون محتسبانو ته پراخ واکونه ورکړي دي. دغه مأمورین د افغانستان په بېلابېلو سیمو کې د خلکو پر چلند، پوښښ او ټولنیزو فعالیتونو څارنه کوي؛ هغه موضوع چې د ګڼو بشري حقونو بنسټونو له خوا تر نیوکو لاندې ده.
د نیمروز له نظره، د محتسبانو د واکونو پراختیا او د امر بالمعروف قانون عملي کېدل لا هم د افغانستان له تر ټولو بحثپارونکو موضوعاتو څخه دي، ځکه د طالبانو او نړیوالې ټولنې ترمنځ د اختلاف یوه مهمه برخه د همدې سیاستونو له امله رامنځته شوې ده.
