د امریکا ولسمشر ډونالډ ټرمپ د جي۷ غونډې په څنډه کې یو ځل بیا ټینګار کړی چې ایران باید په هېڅ شرایطو کې اټومي وسلې ترلاسه نه کړي.
ټرمپ ویلي، که د ایران اسلامي جمهوریت اټومي وسلې ترلاسه کړي، «ټول جهنم به پرې راکوز شي». نوموړي زیاته کړې چې همدې موضوع ته په پام سره یې ټینګار کړی چې په وروستي تفاهم کې داسې څرګند بند شامل شي چې ایران نه یوازې د اټومي وسلو له جوړولو، بلکې د هغو له پېرلو هم منع کړي.
د امریکا ولسمشر د واشنګټن او تهران ترمنځ د احتمالي توافق د چوکاټ په اړه وویل: «یوازینی څه چې راته واقعاً اهمیت لري دا دي چې ایران هېڅکله اټومي وسلې ونه لري، او دا موضوع په توافق کې په بشپړ وضاحت سره شامله شوې ده.»
هغه زیاته کړه چې ایران به نه د اټومي وسلو د پراختیا اجازه ولري او نه به د هغو د ترلاسه کولو یا پېرلو امکان.
ټرمپ خبرداری ورکړ چې که تهران له دغو ژمنو سرغړونه وکړي، له «نه باور کېدونکو پایلو» سره به مخ شي.
نوموړي ادعا وکړه چې د ایران د اټومي وسلو مخنیوی د واشنګټن اصلي انګېزه وه چې د وروستي بحران په مدیریت او د مذاکراتو په ملاتړ کې یې رول ولوباوه.
د امریکا ولسمشر د جي۷ غونډې په څنډه کې د قطر له امیر سره د لیدنې پر مهال د ایران په اړه د راتلونکو خبرو اترو په باب هم خوشبیني څرګنده کړه.
د هغه په وینا، د وروستي تفاهم له لاسلیک وروسته به د مذاکراتو دوهم پړاو پیل شي او دا پړاو به د لومړي پړاو په پرتله اسانه وي.
د ټرمپ څرګندونې داسې مهال مطرح کېږي چې د تهران او واشنګټن ترمنځ وروستی تفاهم لا هم د نړیوالو سیاسي او رسنیزو بحثونو په مرکز کې قرار لري او دواړه لوري د راتلونکو خبرو او د توافق د جزئیاتو د بشپړولو لپاره چمتووالی نیسي.
د نیمروز له نظره، د ایران د اټومي پروګرام موضوع لا هم د امریکا او ایران ترمنځ د هر ډول توافق اساسي محور ګڼل کېږي او تمه کېږي چې د مذاکراتو په راتلونکو پړاوونو کې هم تر ټولو مهم بحث پاتې شي.
