د ایران د بهرنیو چارو وزیر عباس عراقچي ویلي چې تهران به یوازې هغه توافق ومني چې «عادلانه او هر اړخیز» وي.
دغه څرګندونې د چهارشنبې په ورځ د ثور په ۱۶مه په بیجینګ کې د عراقچي او د چین د بهرنیو چارو وزیر وانګیي تر لیدنې وروسته شوې دي.
عراقچي ټینګار کړی چې چین د ایران «نږدې ملګری» دی او ویلي یې دي چې د دواړو هېوادونو ستراتیژیکه همکاري به په نویو شرایطو کې تر پخوا لا پیاوړې دوام وکړي.
هغه همداراز ادعا وکړه چې هغه جګړه چې د ده په وینا امریکا پیل کړې، د نړیوالو قوانینو ښکاره نقض دی، او ایران به له امریکايي لوري سره په مذاکراتو کې د خپلو حقونو او ګټو د خوندي کولو لپاره ټولې هڅې وکړي.
په ورته وخت کې، د چین د بهرنیو چارو وزیر وانګیي اعلان کړی چې بیجینګ د کړکېچ د کمولو لپاره خپلو هڅو ته دوام ورکولو ته چمتو دی.
هغه ټینګار کړی چې د واشنګټن او تهران مستقیمې خبرې ضروري دي، ځکه سیمه په یوه «برخلیک ټاکونکي پړاو» کې قرار لري.
وانګیي ویلي: «موږ باور لرو چې یو هر اړخیز اوربند ته جدي اړتیا شته، د جګړو دوام د منلو وړ نه دی، او د خبرو او مذاکراتو مسیر ته پابندي خورا مهمه ده.»
دا څرګندونې داسې مهال کېږي چې د سیمې امنیتي او سیاسي کړکېچ لا هم دوام لري او نړیوال لوري د جګړې د پراخېدو د مخنیوي لپاره د دیپلوماتیکو لارو پر اهمیت ټینګار کوي.
