د ایران د بهرنیو چارو وزارت ویاند اسماعیل بقایي اعلان کړی چې تهران په اوسني پړاو کې یوازې د جګړې پر بشپړ بندېدو تمرکز لري او د اټومي پروګرام په ګډون به د نورو موضوعاتو په اړه هېڅ خبرې ونه کړي.
بقایي د دوشنبې په ورځ د ثور په ۱۴مه په خبري غونډه کې وویل چې ایران به د امریکا پر وړاندې «شا ته نه ځي» او ټینګار یې وکړ چې ایران هم «یو ابرقدرت» دی.
هغه زیاته کړه چې د ایران د ۱۴ مادهییز وړاندیز په اړه د امریکا ځواب د پاکستان د منځګړیتوب له لارې ترلاسه شوی او اوس تر ارزونې لاندې دی، خو جزئیات یې نه دي خپاره شوي.
د هغه په وینا، دا وړاندیز یوازې د جګړې پر پای تمرکز لري او اټومي موضوعات پکې شامل نه دي.
بقایي همداراز امریکا په «زیاتې غوښتنې» تورنه کړه او ویې ویل چې د واشنګټن لپاره د دې دریځ بدلون اسانه نه دی.
په دې ترڅ کې، هغه سیمهییزو موضوعاتو ته هم اشاره وکړه، لکه د ایران او لبنان ترمنځ د ویزې معافیت لغوه کېدل او د هرمز تنګي د امنیت لپاره د ایران او عمان ترمنځ د ګډ میکانیزم اړتیا.
دا دریځ ښيي چې ایران هڅه کوي د جګړې موضوع له اټومي خبرو جلا وساتي او د هر ډول راتلونکو خبرو لپاره د جګړې پای ته رسېدل د شرط په توګه مطرح کړي.
شنونکي وایي، دا تګلاره ښايي تهران ته وخت ورکړي، خو په عین حال کې د دیپلوماتیک بنبست د اوږدېدو خطر هم زیاتوي.
