د متحده عربي اماراتو د دفاع وزارت اعلان کړی چې څلور کروز توغندي چې له ایران څخه د دې هېواد پر لور روان وو، کشف شوي چې له ډلې یې درې د اماراتو پر سرحدي اوبو کې رهګیري شوي، او څلورم یې سمندر ته لوېدلی دی.
دې وزارت ویلي چې په بېلابېلو سیمو کې اورېدلې شوې د چاودنو غږونه د هوايي دفاع د عملیاتو پایله وه چې د دغو ګواښونو د شنډولو لپاره ترسره شوي دي.
په همدې حال کې، د فجیره ځايي چارواکو د تېلو له صنعت سره تړلې یوې ساحې کې د اورلګېدنې خبر ورکړی چې د هغوی په وینا د یوې بېپیلوټه الوتکې د برید له امله رامنځته شوې ده.
تر اوسه ایران په رسمي ډول دې راپورونو ته غبرګون نه دی ښودلی.
دا پرمختګونه داسې مهال رامنځته کېږي چې په هرمز تنګي کې د امریکا د پوځي حضور له زیاتېدو سره د سیمې کړکېچ هم د پام وړ لوړ شوی دی.
راپورونه ښيي چې د خلیج کړکېچ نور یوازې تر سمندري ګواښونو محدود نه دی، بلکې د حیاتي زیربناوو پر وړاندې د مستقیمو بریدونو احتمال هم زیات شوی دی.
په دې شرایطو کې، حتی محدودې نښتې هم کولای شي ژر تر ژره پراخې جګړې ته واوړي؛ داسې جګړه چې اغېزې یې نه یوازې سیمه، بلکې د نړۍ د انرژۍ بازار هم اغېزمنولای شي.
د ایران چوپتیا د دې پېښو په اړه لا نورې پوښتنې راپورته کړې او د سیاسي او پوځي کړکېچ د لا زیاتېدو احتمال یې لوړ کړی دی.
