د فرانسې ولسمشر امانوئل مکرون د امریکا له لوري په هرمز تنګي کې د «پروژه ازادي» عملیاتو له پیل سره هممهاله له واشنګټن او تهران څخه غوښتي چې دا حیاتي سمندري لار په «همغږۍ» بېرته پرانېزي.
د فرانسې خبري اژانس د راپور له مخې، مکرون د اروپايي مشرانو په غونډه کې ویلي چې د هرمز تنګي د دوامدارې پرانیستې یوازینۍ لار د امریکا او ایران مستقیمه همکاري ده.
هغه همداراز ټینګار کړی چې فرانسه به په هېڅ هغه پوځي عملیاتو کې ګډون ونه کړي چې چوکاټ یې «نامعلوم» وي؛ هغه دریځ چې د پاریس او واشنګټن ترمنځ د رویکرد اختلاف څرګندوي.
دا په داسې حال کې ده چې امریکا د زرګونو سرتېرو په ګډون د کښتیو د اسکورت پراخ عملیات پیل کړي او هدف یې د دې لارې د خوندي تګ راتګ تضمین بولي.
په ورته وخت کې، ایراني چارواکو خبرداری ورکړی چې هر ډول بهرنی پوځي حضور په هرمز تنګي کې کولای شي له غبرګون سره مخ شي.
د مکرون څرګندونې ښيي چې د بحران د مدیریت په اړه د اروپا او امریکا ترمنځ جدي واټن شته؛ واشنګټن پر پوځي بازدارندګۍ تکیه کوي، خو اروپا د دیپلوماسۍ له لارې د کړکېچ مهار غواړي.
هرمز تنګی، چې د نړۍ د انرژۍ له مهمو لارو څخه دی، اوس د نړیوالې تقابل اصلي نقطه ګرځېدلې، او هر یو اړخیز اقدام کولای شي د مستقیمې جګړې خطر زیات کړي.
د «همغږې پرانیستې» غوښتنه په اصل کې هڅه ده چې اقتصادي بحران په یوه پراخه پوځي تقابل بدل نه شي؛ هغه سناریو چې اغېزې یې له سیمې ډېرې پراخېدای شي.
