د افغانستان یو سیاسي مشر عبدرب الرسول سیاف د محمد محقق وروستیو څرګندونو ته په غبرګون کې د ډیورنډ موضوع «اختلافبرانګېزه قضیه» بللې ده.
هغه ویلي چې پر یو بل د نیوکو او سپکاوي پر ځای، غوره ده چې د ډیورنډ کرښې او نورو مهمو موضوعاتو په اړه پرېکړه د خلکو ارادې ته وسپارل شي.
سیاف ټینګار کړی چې دا ډول موضوعات باید د ملي اجماع له لارې حل شي، نه دا چې د سیاسي اختلافاتو سبب وګرځي.
دا څرګندونې وروسته له هغې کېږي چې د ډیورنډ کرښې په اړه وروستي بحثونه یو ځل بیا د افغانستان په سیاسي ډګر کې تود شوي دي.
شنونکي وایي چې د دې موضوع راپورته کېدل د سیاسي اختلافاتو د زیاتېدو ښکارندویي کوي او لا هم د حل روښانه لاره نه لري.
