په دایکندي ولایت کې ځايي سرچینو تلویزیون نیمروز ته ویلي چې د طالبانو استخباراتو د سنګتخت او بندر ولسوالۍ د معارف آمر ناظر جعفري نیولی دی.
د سرچینو په وینا، دغه اقدام وروسته له هغې شوی چې نوموړي د جعفري مذهب اړوند کتابونو د راټولولو مخالفت کړی و.
د سرچینو د معلوماتو له مخې، ناظر جعفري د ثور په ۲۲مه، د سېشنبې په ورځ، له خپل کاري ځایه نیول شوی او تر اوسه د هغه د ساتلو ځای او برخلیک په اړه معلومات نشته.
سرچینو زیاته کړې چې د طالبانو چارواکو هم د هغه د وضعیت په اړه کوم وضاحت نه دی ورکړی.
ناظر جعفري د بامیان ولایت د پنجاب ولسوالۍ اوسېدونکی دی او د پخواني حکومت پر مهال یې د بامیان د معارف ریاست دنده هم ترسره کړې ده.
د سرچینو په وینا، د هغه کورنۍ په بامیان کې هم د طالبانو د استخباراتو تر سختې څارنې لاندې ده.
سرچینو همدارنګه ټینګار کړی چې نوموړی د کوچیانو او کلیوالو ترمنځ د شخړو د حل د ولسي شورا مسئول هم و.
دغه پېښه داسې مهال راپور کېږي چې په وروستیو میاشتو کې پر افغان شیعهمذهبانو، په ځانګړي ډول د جعفري مذهب پر پیروانو، د طالبانو د فشارونو په اړه نیوکې زیاتې شوې دي.
محمد محقق، د افغانستان د اسلامي وحدت ګوند مشر، مخکې ویلي وو چې طالبانو جعفري مذهب له رسميت څخه ایستلی او د شیعهګانو د ځینو مذهبي احکامو د عملي کېدو مخه یې نیولې ده.
شنونکي وایي، که د دغه ښوونیز مسئول نیول د مذهبي کتابونو د راټولولو له مخالفت سره تړاو ولري، نو دا به د افغانستان په شیعهمېشتو سیمو کې د مذهبي او تعلیمي محدودیتونو د زیاتېدو نښه وي.
دغه موضوع د افغانستان د مذهبي ازادیو او فرهنګي تنوع په اړه اندېښنې هم زیاتې کړې دي.
