د طالبانو د پولیسو ویاند خالد ځدراڼ تایید کړې چې یو کس په کابل ښار کې خپل موټر د نجونو له یوې ډلې سره جنګولی او یو شمېر یې ټپیانې کړې دي.
ځدراڼ د پنجشنبې په ورځ ویلي چې د پېښې عامل پېژندل شوی او د نیولو لپاره یې هڅې روانې دي.
د هغه په وینا، ټپیانې شوې نجونې روغتون ته لېږدول شوې او روغتیايي وضعیت یې د ډاډ وړ بلل شوی دی.
د خپرو شویو معلوماتو له مخې، دغه پېښه د غبرګولي په ۱۷مه د کابل ښار د شپږمې امنیتي حوزې په مربوطاتو کې رامنځته شوې ده.
سرچینې وایي یو سپین رنګه لندکروزر موټر له هغو ځوانو نجونو سره ټکر کړی چې د سړک پر غاړه روانې وې.
د معلوماتو له مخې، یاد موټر د نمبر پلېټ پرته و او ښیښې یې تورې شوې وې.
د طالبانو د پولیسو ویاند ویلي چې په دې پېښه کې درې ښځې ټپیانې شوې دي، خو د قربانیانو د هویت او د احتمالي انګېزې په اړه یې نور جزئیات نه دي ورکړي.
دغه څرګندونې داسې مهال کېږي چې د پېښې ویډیو په ټولنیزو شبکو کې له پراخ خپرېدو وروسته، طالبانو نږدې څلور ورځې وروسته په رسمي ډول د موضوع په اړه دریځ څرګند کړی دی.
سره له دې چې د پېښې د عامل د پېژندلو ادعا شوې، خو طالبانو تر اوسه نه دي روښانه کړي چې ولې نوموړی له څو ورځو تېرېدو وروسته هم نه دی نیول شوی او د نیولو لپاره یې کوم عملي اقدامات ترسره شوي دي.
د دې پېښې مهم اړخ دا دی چې د ټولنیزو شبکو له لارې د ویډیو له خپرېدو وروسته د عامه افکارو پام ورته واوښت او د پېښې د څرنګوالي، د عامل د هویت او د قانوني تعقیب په اړه ګڼې پوښتنې راپورته شوې دي.
