نیویارک ټایمز د دوو باخبره سرچینو له قوله راپور ورکړی چې د امریکا د پوځ یوه اپاچي جنګي چورلکه د دوشنبې په ورځ د هرمز تنګي ته نږدې نسکوره شوې ده.
د راپور له مخې، د چورلکې دواړه عمله په خوندي ډول ژغورل شوې او جدي ټپونه یې نه دي ترلاسه کړي.
یوې سرچینې ورځپاڼې ته ویلي چې د پېښې په اړه پلټنې روانې دي او لا هم نه ده معلومه چې چورلکه د ایران د ځواکونو د ډزو له امله راغورځېدلې، تخنیکي ستونزه یې لرله او که کوم بل عامل د پېښې سبب شوی دی.
تر اوسه امریکايي چارواکو د پېښې د جزییاتو په اړه رسمي معلومات نه دي خپاره کړي.
سپینې ماڼۍ او د امریکا مرکزي قوماندانۍ (سنتکام) هم د راپور تر خپرېدو پورې په دې اړه رسمي دریځ نه دی څرګند کړی.
هرمز تنګی د نړۍ له مهمو ستراتیژیکو سمندري لارو څخه ګڼل کېږي او د نړیوالې انرژۍ د لېږد یوه مهمه برخه له همدې لارې ترسره کېږي. له همدې امله په دې سیمه کې هر ډول پوځي پېښه نړیوال پام ځانته را اړوي.
دغه راپور داسې مهال خپرېږي چې په وروستیو اوونیو کې د خلیج سیمې امنیتي وضعیت لا پسې ترینګلی شوی او د ایران او امریکا ترمنځ کړکېچ زیات شوی دی.
تر اوسه د چورلکې د سقوط د علت په اړه خپلواکې شواهد نه دي خپاره شوي او تمه کېږي چې د رسمي تحقیقاتو له بشپړېدو وروسته نور معلومات وړاندې شي.
