د کردستان د بشري حقونو شبکې په یوه تازه راپور کې ادعا کړې چې د سرپل ولایت په کوهستاناتو ولسوالۍ کې د طالبانو یو سیمهییز چارواکی د یوې کردۍ ښځې او د هغې د تنکې لور د وژنې مسئول دی.
د راپور له مخې، چیمن حسینزاده، چې د ایران د بوکان ښار اصله اوسېدونکې وه، او د هغې ۱۵ کلنه لور سارا یوسفي د مې میاشتې په اتمه نېټه د کوهستاناتو ولسوالۍ د غلدوري کلي په سیمه کې وژل شوې دي.
یادې شبکې ویلي چې چیمن حسینزاده شاوخوا شل کاله وړاندې له یوه افغان وګړي سره واده کړی و او له هماغه وخته په سرپل کې اوسېده. نوموړې د سیمې د خلکو ترمنځ د «بي بي چمن ګل» په نوم پېژندل کېده او د قابلې په توګه یې فعالیت کاوه.
د راپور له مخې، مفتي محمدالله، چې د طالبانو د حج او اوقافو د ادارې مسئول بلل شوی، غوښتل له سارا یوسفي سره واده وکړي.
یوې سرچینې د بشري حقونو شبکې ته ویلي چې نوموړی د پېښې په ورځ د کورنۍ کور ته ورغلی او هڅه یې کړې چې نجلۍ له ځان سره بوځي.
د همدې روایت له مخې، کله چې د نجلۍ مور د دې اقدام مخالفت کړی، پر مور او لور ډزې شوې او دواړو خپل ژوند له لاسه ورکړی دی.
شبکې همداراز ویلي چې د پېښې له رامنځته کېدو وروسته طالبانو تورن کس نیولی دی، خو تر اوسه د تحقیقاتو، قضیې د وضعیت او احتمالي پایلو په اړه نور معلومات نه دي خپاره شوي.
د راپور له مخې، د چیمن حسینزاده کورنۍ په ایران کې د مې میاشتې په وروستیو کې له دې پېښې خبر شوې او وروسته یې د مور او لور په یاد یو سمبولیک مراسم هم ترسره کړي دي.
دغه راپور داسې مهال خپرېږي چې د ښځو پر وړاندې د تاوتریخوالي، اجباري ودونو او د ښځو د حقونو په اړه اندېښنې لا هم د افغانستان د بشري حقونو د بحثونو مهمه برخه جوړوي.
تر اوسه طالبانو د دغو ادعاوو او راپور په اړه رسمي دریځ نه دی خپور کړی او د پېښې د جزئیاتو په اړه خپل نظر نه دی څرګند کړی.
