طالبانو د هرات ولایت د انجیل ولسوالۍ له پېښې وروسته د دوو وژل شویو کسانو جسدونه د ښار په بېلابېلو سیمو کې وګرځول؛ هغه اقدام چې د خلکو او د بشري حقونو د فعالانو ترمنځ یې پراخ غبرګونونه راپارولي دي.
د پنجشنبې په ورځ د طالبانو وسله والو د دغو دوو کسانو وینې لړلي جسدونه د یوه پوځي رنجر موټر په شا برخه کې ځای پر ځای کړل او د هرات ښار په ګڼو واټونو او سیمو کې یې وګرځول.
طالب چارواکو ادعا کړې چې وژل شوي کسان «وسله وال غله» وو او د یوې وسله والې غلا پر مهال د طالبانو له امنیتي ځواکونو سره په نښته کې وژل شوي دي.
خو طالبانو تر اوسه د دغو کسانو هویت، د پېښې بشپړ جزئیات او د لګول شویو تورونو په اړه کوم مستقل شواهد نه دي خپاره کړي.
په ټولنیزو رسنیو کې خپرې شوې ویډیوګانې او انځورونه ښيي چې جسدونه د خلکو د لیدو لپاره ښکاره ایښودل شوي وو او ګڼ شمېر خلک یې نندارې ته راټول شوي وو.
د طالبانو د هرات امنیې قوماندانۍ هم د یوې ویډیو په خپرولو سره د پېښې پخلی کړی او ادعا یې کړې چې وژل شوي کسان په وسله والو غلاوو کې ښکېل وو.
یو شمېر د هرات اوسېدونکي وایي چې د دغو صحنو لیدلو په ځانګړي ډول پر ماشومانو، ښځو او کورنیو منفي رواني اغېزې کړې دي.
ځینو اوسېدونکو ویلي چې د جسدونو ښکاره ننداره په ټولنه کې د وېرې او اضطراب د زیاتېدو لامل ګرځي او د خلکو د ذهني سلامتۍ لپاره زیانمنه ده.
دا لومړی ځل نه دی چې طالبان له دې ډول کړنلارې کار اخلي.
په تېرو کلونو کې هم په هرات او د افغانستان په نورو ولایتونو کې ورته پېښې ثبت شوې دي.
طالبان تل استدلال کوي چې د داسې اقداماتو موخه د جرمونو مخنیوی او نورو ته عبرت ورکول دي.
د طالبانو د هرات امنیې قوماندانۍ د شمېرو له مخې، یوازې په تېرو شپږو میاشتو کې ۸۸۲ کسان په دې ولایت کې د غلا په تور نیول شوي دي.
طالبان دا شمېرې د جنايي جرمونو پر ضد د خپلو عملیاتو د پراخېدو نښه بولي.
خو د بشري حقونو بنسټونه او منتقدان بیا ټینګار کوي چې د جسدونو نندارې ته وړاندې کول د انساني کرامت له اصولو او نړیوالو بشري معیارونو سره په ټکر کې دي.
دوی وایي چې د عدالت پلي کول باید د قانوني او قضایي اصولو له لارې ترسره شي، نه د هغو لارو چارو له مخې چې د خلکو ترمنځ ویره خپروي.
د هرات وروستۍ پېښه یو ځل بیا په افغانستان کې د عدالت د تطبیق، د جرمونو پر وړاندې د چلند او د انساني کرامت د رعایت په اړه بحثونه راژوندي کړي دي.
شنونکي باور لري چې د جرمونو د مخنیوي او د ټولنیز نظم د ساتلو تر څنګ، د بشري حقونو او انساني ارزښتونو رعایت هم د هرې ادارې لپاره مهم اصل ګڼل کېږي.
