رسنیز راپورونه ښيي چې دوبۍ، چې د منځني ختیځ له مهمو سوداګریزو او ګرځندویزو مرکزونو څخه ګڼل کېږي، په وروستیو میاشتو کې د ګرځندوی د کمښت او د مېلمه پالنې په سکتور کې د فعالیت د ټیټېدو له ستونزې سره مخ شوې ده.
د یوې برتانوي ورځپاڼې د راپور له مخې، ګڼ شمېر هوټلونه، رستورانتونه او تفریحي مرکزونه د نویو مشتریانو د جذب لپاره پراخو تخفیفونو، وړیا خدمتونو او ځانګړو امتیازونو ته مخه کړې ده؛ هغه څه چې په تېرو کلونو کې لږ تر سترګو کېدل.
راپور زیاتوي چې د دوبۍ یو شمېر مشهورې سیمې، چې پخوا به د زرګونو کورنیو او بهرنیو ګرځندویانو کوربه وې، اوس د لیدونکو د شمېر له څرګند کمښت سره مخ دي.
د ګرځندوی د صنعت ځینو فعالانو او د سوداګرۍ څښتنانو ویلي چې د هوټلونو د خوندي کولو غوښتنې کمې شوې او د نړیوالو ګرځندویانو شمېر هم راټیټ شوی دی.
د راپور له مخې، د سیمې وروستیو امنیتي او سیاسي تحولاتو د ځینو مسافرو پر پرېکړو اغېز کړی او د سفرونو په اړه یې اندېښنې زیاتې کړې دي. ځینو ګرځندویانو هم د سیمې د پوځي ترینګلتیاوو د رواني اغېزو یادونه کړې ده.
په ورته وخت کې د دوبۍ په هوايي ډګرونو کې د مسافرو د تګ راتګ د کمېدو او د هوټلونو د خونو د ډکېدو د کچې د ټیټېدو په اړه هم راپورونه خپاره شوي دي.
اقتصادي شنونکي خبرداری ورکوي چې که اوسنی وضعیت دوام وکړي، د متحده عربي اماراتو د ګرځندوی او مېلمه پالنې سکتور به له لا ډېرو اقتصادي فشارونو سره مخ شي.
ګرځندوی د دوبۍ د اقتصاد له مهمو ستنو څخه ګڼل کېږي. دغه ښار په تېرو دوو لسیزو کې د هوټلونو، سوداګریزو مرکزونو، تفریحي پروژو او هوايي ترانسپورټ په برخه کې پراخې پانګونې کړې دي او د نړۍ له مهمو ګرځندویزو مرکزونو څخه شمېرل کېږي.
خو د سیمې دوامدارې ناڅرګندتیاوې، د سفرونو د لګښتونو لوړېدل او امنیتي اندېښنې کولای شي د دې صنعت پر راتلونکې ودې اغېز وکړي.
د همدې لپاره د دوبۍ د ګرځندوی سکتور وضعیت به په راتلونکو میاشتو کې د خلیج د هېوادونو پر اقتصاد د سیمه ییزو تحولاتو د اغېزو د ارزونې یو مهم شاخص وبلل شي.
