د پاکستان د دفاع وزیر خواجه آصف ویلي چې د ټي ټي پي په اړه د طالبانو په چلند کې هېڅ عملي بدلون نه دی لیدل شوی او اسلام آباد لا هم باور لري چې د دې ډلې پر وړاندې جدي اقدامات نه دي شوي.
نوموړي د هغو راپورونو په غبرګون کې چې ګواکې د طالبانو مشر هبت الله اخندزاده تحریک طالبان پاکستان ته د بریدونو د درولو سپارښتنه کړې، ویلي چې دغه موضوع یوازې د رسنیو تر کچې محدوده ده او په عملي ډګر کې یې کومه پایله نه ده لرلې.
خواجه آصف ټینګار کړی چې د طالبانو له خوا د ټي ټي پي د ملاتړ د پای ته رسېدو په اړه تر اوسه کومه څرګنده نښه نه ده لیدل شوې او د اسلام آباد اندېښنې لا هم پر خپل ځای پاتې دي.
هغه خبرداری ورکړی چې د وسله والو ډلو د مهار په اړه د طالبانو پر متضادو پیغامونو باور کول خطرناک دي او پاکستان یوازې هغه مهال قانع کېدای شي چې عملي او محسوس اقدامات وویني.
دغه څرګندونې وروسته له هغې مطرح شوې چې یوې پاکستانۍ ورځپاڼې راپور ورکړی و چې طالبانو په غیر رسمي ډول پاکستان ته پیغام ورکړی او ویلي یې دي چې د طالبانو مشر هبت الله اخندزاده ټي ټي پي ته سپارښتنه کړې چې په پاکستان کې بریدونه ودروي.
د راپور له مخې، پاکستاني چارواکو دغه پیغام ناکافي بللی او ټینګار یې کړی چې یوازې لفظي سپارښتنې د اسلام آباد امنیتي اندېښنې نه شي لرې کولای. پاکستان غواړي طالبان د ټي ټي پي د فعالیتونو د مخنیوي لپاره روښانه او عملي تضمینونه وړاندې کړي.
راپورونه ښيي چې طالبانو په وروستیو میاشتو کې هڅه کړې له پاکستان سره اړیکې ښې کړي او اسلام آباد ته ډاډ ورکړي چې د افغانستان له خاورې به د پاکستان پر ضد وسله وال فعالیتونه نه ترسره کېږي.
د طالبانو او پاکستان اړیکې په وروستیو میاشتو کې له پرله پسې ترینګلتیاوو سره مخ شوې دي. سرحدي نښتې، په پاکستان کې د ټي ټي پي بریدونه او د دواړو لورو متقابل تورونه د دې لامل شوي چې اړیکې د وروستیو کلونو تر ټولو پېچلي پړاو ته داخلې شي.
په همدې حال کې سعودي عربستان، قطر، ترکیې او چین هڅه کړې چې د دواړو لورو ترمنځ د خبرو اترو لپاره زمینه برابره کړي، خو تر اوسه دغو هڅو د اختلافاتو په کمولو کې د پام وړ پایله نه ده لرلې.
پاکستان لا هم له طالبانو غواړي چې د ټي ټي پي د نه ملاتړ په اړه روښانه تضمین ورکړي او د دې ډلې غړي له افغانستانه وباسي. طالبان بیا ټینګار کوي چې د افغانستان له خاورې هېڅ ډلې ته د نورو هېوادونو پر ضد د فعالیت اجازه نه ورکول کېږي.
د خواجه آصف وروستۍ څرګندونې ښيي چې د طالبانو او پاکستان ترمنځ د بې باورۍ فضا لا هم ژوره ده. داسې ښکاري چې تر هغه وخته چې د ټي ټي پي د فعالیتونو په اړه عملي بدلون رامنځته نه شي، د دواړو لورو اړیکې به له فشار او سیاسي ترینګلتیا سره مخ پاتې وي.
