د طالبانو د امر بالمعروف او نهی عن المنکر ریاست په غزني ولایت کې ویلي چې د اندر ولسوالۍ د تفریحي سیمو د څارنې پر مهال یې د موسیقۍ او ساتیرۍ یو شمېر وسایل ضبط کړي دي.
د دې ادارې د ورځني راپور له مخې، طالب ځواکونو د یکشنبې په ماښام د اندر ولسوالۍ له بېلابېلو سیمو او د ولسوالۍ له عامه پارک څخه لیدنه کړې ده.
په راپور کې راغلي چې د دغو عملیاتو پر مهال ۱۴ دایرې، ۸ د موسیقۍ غږولو وسایل (MP3) او ۱۵ د لوډو لوبې وسایل له هغو ځوانانو څخه راټول شوي چې د تفریح لپاره په یادو سیمو کې حاضر وو.
طالبانو په خپل راپور کې د هغو کسانو د شمېر په اړه څه نه دي ویلي چې ښايي د دې اقدام په تړاو نیول شوي وي.
خو د طالبانو چارواکو تر دې وړاندې خبرداری ورکړی و چې هغه کسان به ونیسي او قانوني تعقیب به یې کړي چې د دوی له ټاکل شویو مقرراتو سرغړونه وکړي.
په وروستیو کلونو کې د طالبانو د امر بالمعروف او نهی عن المنکر ادارې د افغانستان په بېلابېلو برخو کې پر کلتوري، هنري، تفریحي او ټولنیزو فعالیتونو پراخ محدودیتونه لګولي دي.
د بشري حقونو سازمانونو او مدني فعالانو د دغو محدودیتونو په اړه اندېښنه څرګنده کړې او ویلي یې دي چې دا اقدامات د خلکو، په ځانګړي ډول د ځوانانو، پر ټولنیز او کلتوري ژوند اغېز کوي.
