د امريکا استخباراتي ارزونې ښيي چې د ايران اسلامي جمهوريت د شپږ اوونيز اوربند پر مهال د خپلو ډرونونو د توليد يوه برخه بېرته پيل کړې او تر لومړنيو اټکلونو ډېر ژر د خپل پوځي توان د بيا رغونې په حال کې دی.
سي اېن اېن د باخبره سرچينو له قوله راپور ورکړی چې ايران د اپرېل له پيل راهيسې، هممهاله له اوربند سره، د ډرونونو د توليد ځينې کرښې بيا فعالې کړې دي.
څلورو باخبره سرچينو دغې رسنۍ ته ويلي چې د امريکا مالومات ښيي د ايران پوځ هغه توغنديز مرکزونه، توغندي توغوونکي او د وسلو د ځينو مهمو سيستمونو د توليد وړتياوې بېرته رغوي چې د امريکا او اسرائيلو په بريدونو کې زيانمنې يا له منځه وړل شوې وې.
د سرچينو په وينا، دا بهير ښيي چې که د ايران پر ضد د امريکا پوځي بريدونه بيا پيل شي، تهران لا هم د واشنګټن د سيمه ييزو متحدانو لپاره جدي ګواښ پاتې کېدای شي.
يو امريکايي چارواکي سي اېن اېن ته ويلي چې ځينې استخباراتي ارزونې ښيي ايران ښايي په شپږو مياشتو کې د ډرون بريدونو بشپړ توان بېرته ورغوي.
هغه زياته کړې:
«ايرانيان د استخباراتي ټولنې له ټولو اټکل شويو مهالوېشونو وړاندې تللي دي.»
د راپور له مخې، د امريکا د سيمه ييزو متحدانو يوه لويه اندېښنه د ايران د ډرون بريدونو د زياتېدو وړتيا ده؛ هغه موضوع چې ښايي د تهران د توغنديز توان کمښت جبران کړي.
سي اېن اېن ليکلي چې ايران د روسيې او چين د ملاتړ او همدارنګه د امريکا او اسرائيلو د بريدونو د محدود زيان له امله تر تمې ژر د بيا رغونې توان موندلی دی.
دوو باخبره سرچينو ويلي چې چين د جګړې پر مهال ايران ته داسې پرزې ورکړې چې د توغنديو په جوړولو کې کارېدلی شي، خو دغه بهير د امريکا د محاصرې له امله محدود شوی دی.
د اسرائيلو لومړي وزير بنيامين نتنياهو هم تېره اوونۍ ادعا کړې وه چې چين ايران ته «د توغنديو د جوړولو پرزې» ورکوي؛ هغه ادعا چې د چين د بهرنيو چارو وزارت وياند رد کړې ده.
د امريکا د تازه استخباراتي ارزونو له مخې، ايران د سختو بريدونو باوجود لا هم د بالستيک توغنديو، ډرونونو او هوايي دفاعي سيستمونو يوه برخه وړتيا ساتلې ده.
سي اېن اېن تر دې مخکې راپور ورکړی و چې د ايران شاوخوا نيمايي توغندي توغوونکي له بريدونو ژوندي پاتې شوي، خو نويو ارزونو دغه کچه تر دوو پر درېيو لوړه کړې ده.
باخبره سرچينو ويلي چې د دې زياتوالي يو لامل دا دی چې ايران د اوربند پر مهال تر خاورو لاندې شوي ځينې توغندي توغوونکي بېرته را ايستلي دي.
راپورونه دا هم ښيي چې د ايران زرګونه ډرونونه لا هم پاتې دي او د دغه هېواد شاوخوا پنځوس سلنه ډروني ځواک خوندي پاتې شوی دی.
د امريکا استخباراتي ارزونې ښيي چې د ايران د ساحلي دفاعي کروز توغنديو يوه مهمه برخه هم خوندي پاتې شوې؛ هغه توغندي چې تهران يې د هرمز تنګي کې د بېړيو د تګ راتګ د ګواښلو مهمه وسيله ګڼي.
سره له دې، باخبره سرچينې وايي د ايران دفاعي صنعتي بنسټ ته اوښتی زيان ښايي د بيا رغونې بهير يوازې د څو مياشتو لپاره شاته کړی وي، نه د څو کلونو لپاره؛ ځکه د ايران د پوځي زېربناوو يوه برخه لا هم سالمه پاتې ده.
