د فرانسې د ولسمشرۍ ماڼۍ الیزه اعلان کړی چې فرانسه او متحدان یې د هرمز تنګي د امنیت د تضمین وړتیا لري.
الیزه ماڼۍ د چهارشنبې په ورځ د مې په ۶مه (د ثور ۱۶مه) ویلي چې پاریس غواړي د هرمز تنګي موضوع د امریکا او ایران له روانو خبرو جلا وساتل شي.
دغه څرګندونې داسې مهال مطرح کېږي چې په سیمه کې د سمندري امنیت او د نړیوالې انرژۍ د لېږد په اړه اندېښنې زیاتې شوې دي.
فرانسوي پوځ تر دې وړاندې اعلان کړی و چې د «شارل دوګل» هوايي بېړۍ وړونکې ډله د سره سمندر او عدن خلیج پر لور روانه ده.
د فرانسې د پوځ په وینا، دا اقدام د فرانسې او بریتانیا د هغو چمتووالي هڅو برخه ده چې ښايي په راتلونکي کې د هرمز تنګي د کښتۍ چلونې د آزادۍ د ملاتړ لپاره احتمالي ماموریت ترسره کړي.
شنونکي وایي، د فرانسې دا دریځ ښيي چې اروپا هڅه کوي د هرمز بحران یوازې د امریکا او ایران ترمنځ په مستقیم تقابل بدل نه شي.
د هرمز تنګی، چې د نړۍ د انرژۍ د لېږد له مهمو لارو څخه شمېرل کېږي، د هر ډول پوځي یا امنیتي کړکېچ په صورت کې د نړیوال اقتصاد او سیمهییز ثبات لپاره پراخې پایلې لرلای شي.
