د افغانستان پخوانی ولسمشر حامد کرزی وایي، د هېواد د خپلواکۍ ساتنه هغه مهال شونې ده چې افغانستان لوستي ځوانان ولري، که هغه نجونې وي او که هلکان.
حامد کرزي د چهارشنبې په ورځ، د زمري پر ۲۸مه، د افغانستان د خپلواکۍ د بېرته ترلاسه کولو د ۱۰۷مې کلیزې په مناسبت په یوه پیغام کې یو ځل بیا د هېواد د ټولو ماشومانو لپاره د زده کړو د فرصت پر برابرولو ټینګار کړی دی.
کرزي ویلي، که څه هم د خپلواکۍ ترلاسه کول ارزښت لري، خو د هغې ساتنه هغه وخت ممکنه ده چې افغانستان یو پیاوړی او پر خپلو امکاناتو ولاړ هېواد وي.
هغه زیاته کړې چې د یوه هېواد ځواک په تلپاتې سولې او ثبات، ملي یووالي او د لوستو ځوانانو په لرلو پورې تړلی دی.
د افغانستان پخواني ولسمشر له حکومت څخه غوښتي چې د هېواد ټولو ماشومانو، نجونو او هلکانو ته د زده کړو زمینه برابره کړي او ټینګار یې کړی چې د ځوان نسل زده کړه د افغانستان د راتلونکي د جوړولو لپاره اساسي ارزښت لري.
کرزي تر دې وړاندې هم څو ځله له طالبانو غوښتي چې پر ښځو او نجونو لګېدلي د زده کړو او کار محدودیتونه لرې کړي او هغوی ته د ښوونځیو، پوهنتونونو او کاري چاپېریال ته د بېرته ستنېدو زمینه برابره کړي.
د کرزي دغه پیغام په داسې حال کې خپرېږي چې طالبان لا هم له شپږم ټولګي پورته د نجونو زده کړې درولې دي او ښځې او نجونې د زده کړو او کار په برخو کې له پراخو محدودیتونو سره مخ دي.
طالبان په داسې حال کې د افغانستان د خپلواکۍ د بېرته ترلاسه کولو کلیزه نمانځي چې دغه هېواد په ۱۲۹۸ لمریز کال کې، د امان الله خان د واکمنۍ پر مهال، له بریتانیا څخه خپله خپلواکي بېرته ترلاسه کړه.
امان الله خان د ښوونیزو او ټولنیزو اصلاحاتو ملاتړ کاوه. د هغه د واکمنۍ پر مهال په افغانستان کې د نجونو لومړنی ښوونځی جوړ شو او د نجونو زده کړې نوي پړاو ته داخلې شوې.
د کرزي د خپلواکۍ د ورځې پیغام یو ځل بیا د ټولګټو زده کړو موضوع د افغانستان د راتلونکي له بحث سره تړي؛ هغه موضوع چې لا هم د افغان ټولنې او نړیوالو بنسټونو له مهمو غوښتنو څخه ده.
