جبهه متحد افغانستان وایي چې ځواکونو یې په تېرو ۲۴ ساعتونو کې د هلمند او کندهار په ولایتونو کې د طالبانو پر ضد درې عملیات ترسره کړي دي.
دغه جبهې د جمعې په ورځ، د زمري پر ۲۳مه، په یوه خبرپاڼه کې ویلي چې د دغو بریدونو له ډلې یو یې د هلمند ولایت په مرکز لښکرګاه ښار کې د طالبانو د پولیسو پر لومړۍ حوزه ترسره شوی دی.
د جبهې د ادعا له مخې، په دغه برید کې د طالبانو دوه پولیس وژل شوي او دوه نور ټپیان شوي دي.
جبهه متحد همداراز وایي چې په بل عملیات کې، د لښکرګاه ښار د اوومې امنیتي حوزې اړوند د بولان په سیمه کې د طالبانو دوه غړي په نښه شوي دي.
د خبرپاڼې په بله برخه کې ویل شوي چې د جبهې ځواکونو د کندهار ولایت د دامان ولسوالۍ په مربوطاتو کې هم په یوه هدفي عملیات کې د طالبانو یو غړی په نښه کړی دی.
جبهه متحد ادعا کوي چې په دغو عملیاتو کې هغه کسان په نښه شوي چې د پخواني افغان حکومت د امنیتي او دفاعي ځواکونو په نیولو، شکنجه کولو او وژلو کې یې لاس درلود.
تر اوسه د هلمند او کندهار سیمه ییزو طالب چارواکو د دغو ادعاوو په اړه کوم غبرګون نه دی ښودلی او د بریدونو د تلفاتو په اړه هم خپلواک معلومات نه دي خپاره شوي.
د جبهه متحد له خوا په ۲۴ ساعتونو کې د درېیو عملیاتو ادعا په داسې حال کې کېږي چې په وروستیو میاشتو کې د طالبانو مخالفو وسله والو ډلو په یو شمېر ولایتونو کې د خپلو فعالیتونو د زیاتېدو خبر ورکړی دی.
خو د دغو بریدونو د واقعي شمېر او تلفاتو په اړه په ډېرو مواردو کې د جګړهځپلو سیمو ته د خپلواکو سرچینو د نه لاسرسي له امله، ادعاوې په خپلواک ډول نه شي تاییدېدای.
