د پاکستان د ملي دموکراتیک غورځنګ مشر محسن داور طالبان «زورواکي» او پر افغانانو تپل شوې ډله بللې او ویلي یې دي چې دا ډله د افغانستان د خلکو د سیاسي ارادې استازیتوب نه کوي.
داور له افغانستان انټرنشنل سره په ځانګړې مرکه کې وویل، د پاکستان ملي دموکراتیک غورځنګ له پیله د دوحې له تړون سره مخالفت کړی و او خبرداری یې ورکړی و چې دغه تړون به د افغانستان د جمهوري نظام د کمزوري کېدو او په پای کې د سقوط زمینه برابره کړي.
هغه د طالبانو واک ته د رسېدو څرنګوالي ته په اشارې وویل چې طالبان نه شي کولای د افغانانو د سیاسي ارادې استازیتوب وکړي او ادعا یې وکړه چې د دې ډلې جوړښت د افغانستان له ټولنیز او فرهنګي وضعیت سره سمون نه لري.
داور همداراز ادعا وکړه چې د طالبانو سیاستونو د افغانانو پر هویت او مليپالنې سخت اغېز کړی دی. د هغه په باور، د طالبانو د واکمنېدو له موخو څخه یوه دا وه چې د افغانستان پر خلکو د هویت او سیاسي پېژندنې په برخه کې فشار زیات شي.
دغه پاکستاني سیاستوال د پاکستان او افغان مليپالنې، په ځانګړي ډول د پښتنو د مليپالنې، ترمنځ تاریخي اختلافاتو ته هم اشاره وکړه او ویې ویل چې دا ستونزه د پاکستان له جوړېدو راهیسې موجوده ده.
داور ادعا وکړه چې پاکستان د طالبانو له موجودیت څخه هم مالي ګټې ترلاسه کړې او هم یې د دې ډلې له لارې هڅه کړې چې د ډیورنډ کرښې دواړو غاړو ته د پښتنو مليپالنه تر فشار لاندې راولي.
د محسن داور څرګندونې په داسې وخت کې مطرح کېږي چې په افغانستان کې د طالبانو د واکمنۍ، د پاکستان د رول او د اسلاماباد او طالبانو د اړیکو موضوع لا هم په سیمه کې له جنجالي بحثونو څخه ده.
