د تاجکستان د ترانسپورټ وزارت اعلان کړی چې د دوشنبې، کابل او تهران ترمنځ د نوي ترانزیټي دهلېز ازمایښتي پړاو به تر راتلونکې یوې میاشتې پیل شي. د دې پروژې له مخې به د تاجکستان او ایران ترمنځ سوداګریز توکي د افغانستان له لارې لېږدول کېږي.
دغه پروژه په مشهد ښار کې د تاجکستان، ایران او د طالبانو د ترانسپورټ او هوايي چلند وزارت د استازو ترمنځ د درېاړخیز پروتوکول له لاسلیک وروسته د عملي کېدو مرحلې ته داخله شوې ده.
دا پروتوکول د تاجکستان د ترانسپورټ وزارت مرستیال شایسته سیدمرادزاده، د ایران د سړکونو او ځمکني ترانسپورټ ادارې مشر رضا اکبري، او د طالبانو د ترانسپورټ او هوايي چلند وزارت استازي یارمحمد رمضان لاسلیک کړی دی.
د تاجکستان د چارواکو په وینا، دا پروژه د تاجکستان د ترانسپورټ وزیر او د ایران او طالبانو د ترانسپورټي چارواکو ترمنځ د پخوانیو تفاهمونو د دوام په توګه عملي کېږي.
د دې پروژې د پلي کېدو د څار لپاره یو دایمي درېاړخیز کاري ګروپ هم جوړ شوی چې د همغږۍ، د عملي خنډونو د لرې کولو او د دهلېز د پراختیا لپاره به وړاندیزونه چمتو کوي.
د پلان له مخې، د درې واړو لورو استازي به د روان کال د عقرب په میاشت کې په کابل کې سره وګوري، څو د شویو هوکړو د عملي کېدو بهیر او د ترانزیټي همکاریو پراختیا وارزوي.
درې واړه هېوادونه همدارنګه غواړي د سرحدي زیربناوو په ښه کولو، د باروړونکو موټرو د انتظار وخت په کمولو، د اسنادو د صادرولو د بهیر په ساده کولو او د ترانسپورټي بیمې د خدمتونو په پراخولو سره سوداګریزې راکړې ورکړې اسانه کړي.
د دې پروژې چارواکي وایي، په راتلونکو پړاوونو کې به دا ترانزیټي دهلېز د منځنۍ اسیا نورو هېوادونو او چین ته هم وغځول شي.
