بېسرحده ډاکټرانو له پاکستانه غوښتي چې د افغان کډوالو جبري ایستل ودروي او خبرداری یې ورکړی چې زرګونه افغانان په دغه هېواد کې د نیول کېدو، د عاید له لاسه ورکولو او جبري ایستلو له دوامدارې وېرې سره ژوند کوي.
دغه سازمان د سېشنبې په ورځ په خپره شوې اعلامیه کې ویلي، ډېری افغان کډوال د نیول کېدو د اندېښنې له امله روغتیايي مرکزونو ته نه ورځي، او یا هم هغه مهال د درملنې لپاره مراجعه کوي چې ناروغي یې جدي پړاو ته رسېدلې وي.
بېسرحده ډاکټرانو ویلي، دې وضعیت د مخنیوي وړ روغتیايي ستونزې زیاتې کړې دي، چې د ماشومانو خوارځواکي او د امیندوارۍ جدي عوارض هم پکې شامل دي.
په راپور کې د یوه افغان کډوال کیسه هم خپره شوې چې وایي، سره له دې چې د قانوني استوګنې اسناد یې لرل، د پاکستان د پولیسو د عملیاتو پر مهال ونیول شو. د هغه په وینا، د ده درې میاشتنې امیندواره مېرمن د نوموړي له نیول کېدو او سخت رواني فشار وروسته د وینې بهېدو له امله خپل جنین له لاسه ورکړ.
بېسرحده ډاکټرانو ټینګار کړی چې د جبري ایستلو تګلارې او د نیول کېدو وېرې د افغان کډوالو د کار فرصتونه محدود کړي او د ګڼو کورنیو د ژوند د لګښتونو د برابرولو توان یې کمزوری کړی دی.
د راپور له مخې، د دې سازمان ګرځنده کلینیکونو د ۲۰۲۶ کال په لومړیو میاشتو کې د بلوچستان ایالت د کوټې ښار کې د ماشومانو ترمنځ د حادې خوارځواکۍ لوړه کچه ثبت کړې ده. د معاینه شویو ماشومانو نږدې یو پر درېیمه برخه په حاده خوارځواکۍ اخته وه؛ له دې ډلې ۷.۶ سلنه په شدیدې حادې خوارځواکۍ او ۲۵.۷ سلنه په منځنۍ حادې خوارځواکۍ اخته وو.
سازمان ویلي، د خوارځواکۍ د درملنې لپاره شاوخوا ۹۰ سلنه مراجعه کوونکي افغان کډوال وو او ډېری یې ښځې او ماشومان وو.
بېسرحده ډاکټرانو له پاکستان او نورو هغو هېوادونو غوښتي چې د افغان کډوالو کوربهتوب کوي، تر هغه چې افغانستان ته د خوندي ستنېدو شرایط نه وي برابر شوي، د افغان کډوالو له جبري ایستلو ډډه وکړي.
