چین او د سوېل ختیځې اسیا هېوادونو ټولنې (آسېآن) په یوې ګډې اعلامیې کې د منځني ختیځ د روانو جګړو د دوام په اړه اندېښنه څرګنده کړې او خبرداری یې ورکړی چې د کړکېچ پراخېدل به د سیمې او نړۍ سوله، ثبات او اقتصاد له جدي ګواښ سره مخ کړي.
دا اعلامیه د جمعې په ورځ د فلیپین په پلازمېنه مانیلا کې د چین او د آسېآن د لسو غړو هېوادونو د بهرنیو چارو وزیرانو له غونډې وروسته خپره شوه. په اعلامیه کې راغلي چې د منځني ختیځ چټک بدلونونه او د هغوی له پولو اوښتې اغېزې د ملکي وګړو ژوند او امنیت، نړیواله سوداګري، پانګونه، د انرژۍ امنیت او د خوړو خوندیتوب اغېزمنوي.
چین او آسېآن په ګډه اعلامیه کې د خبرو اترو، ډیپلوماسۍ، څو اړخیزې همکارۍ او د ملګرو ملتونو د منشور او نړیوالو قوانینو پر بنسټ د شخړو د سولهییز حل پر اړتیا ټینګار کړی او له ټولو ښکېلو لورو یې غوښتي چې د تاوتریخوالي له زیاتېدو ډډه وکړي.
دا دریځ په داسې حال کې څرګندېږي چې د تېرې میاشتې په ترڅ کې د امریکا او ایران ترمنځ د «اسلامآباد د تفاهملیک» له لاسلیک وروسته، چې موخه یې د اپرېل د اتمې نېټې د اوربند ساتل او د جګړې د دایمي پای لپاره د خبرو پیل و، بیا هم د دواړو لورو ترمنځ نښتې او متقابل بریدونه دوام لري.
چین او آسېآن خبرداری ورکړی چې که بېثباتي همداسې دوام وکړي، اغېزې به یې یوازې منځني ختیځ پورې محدودې نه وي، بلکې پر نړیوال اقتصاد، د اکمالاتي ځنځیرونو پر فعالیت، د انرژۍ پر بازارونو او د خوړو پر نړیوال امنیت به هم منفي اغېز وکړي.
دا اعلامیه داسې مهال خپرېږي چې ګڼ سیمهییز او نړیوال قدرتونه هم د تاوتریخوالي د کمېدو او د ښکېلو لورو د بېرته سیاسي او ډیپلوماټیکو خبرو اترو مېز ته د ستنېدو غوښتنه کوي.
