په ژنیو کې د ملګرو ملتونو ترڅنګ د اروپايي ټولنې استازولۍ د ملګرو ملتونو د لوړپوړو چارواکو او د یو شمېر اروپايي او شریکو هېوادونو د استازو په ګډون غونډه جوړه کړه چې پکې د افغانستان بشري بحران او د ښځو د حقونو وضعیت وڅېړل شو.
په دې غونډه کې په ژنیو کې د ملګرو ملتونو ترڅنګ د اروپايي ټولنې سفیر ډیک پوتزل، د استرالیا، ایرلنډ، اتریش، جرمني، هسپانیې، ډنمارک، ناروې، فرانسې، سویډن او یو شمېر نورو هېوادونو استازو ګډون کړی و. همدارنګه، د ملګرو ملتونو د کډوالو عالي کمېشنرۍ لوړپوړي چارواکي برهام صالح هم په غونډه کې حاضر و.
په ژنیو کې د اروپايي ټولنې استازولۍ په اېکس ټولنیزې شبکې کې په خپره کړې اعلامیه کې ویلي، اروپايي ټولنه د افغانستان د خلکو ترڅنګ ولاړه ده، د افغان ښځو او نجونو له حقونو ملاتړ کوي او بشري مرستو ته به دوام ورکړي.
په اعلامیه کې ټینګار شوی چې افغانستان لا هم د نړۍ له تر ټولو سترو او پېچلو بشري بحرانونو څخه له یوه سره مخ دی او دوامدار نړیوال ملاتړ او پاملرنې ته اړتیا لري.
برهام صالح هم تر دې وړاندې افغانستان ته د خپل سفر پر مهال د بېرته ستنېدونکو لپاره د اساسي خدماتو، د کارموندنې فرصتونو او د کوربه ټولنو د ملاتړ پر اهمیت ټینګار کړی و؛ هغه موضوعات چې د افغانستان د بشري بحران له مهمو ننګونو څخه ګڼل کېږي.
