د افغانستان د ولسي جرګې پخوانۍ غړې فوزیه کوفي وایي، د بدخشان ولایت د یفتل ولسوالۍ د ملکي وګړو، په ځانګړي ډول د ماشومانو، نیول د طالبانو د ځپنې د سیاست دوام ښيي او خبرداری یې ورکړی چې پر خلکو د فشار زیاتېدل به د ازادۍ لپاره د هغوی اراده لا پیاوړې کړي.
فوزیه کوفي د جمعې په ورځ، د چنګاښ په ۲۶مه، په اېکس ټولنیزې شبکې کې هغه ویډیو بیا خپره کړه چې پکې د یفتل ولسوالۍ د یو شمېر اوسېدونکو د نیولو صحنې لیدل کېږي. هغې لیکلي: «هر څومره چې طالبان خلک زیات وځپي، هماغومره به د خلکو د ازادۍ هیله او اراده پیاوړې شي.»
هغې زیاته کړې چې د عادي خلکو نیول او له هغوی څخه د فشار د وسیلې په توګه کار اخیستل، هغه تګلاره ده چې د هغې په وینا پخوا هم مطلوبه پایله نه ده ورکړې او اوس هم د عامه نارضایتۍ د زیاتېدو مخه نه شي نیولای.
تر دې وړاندې طالبانو په یوه خپره شوې ویډیو کې ویلي وو چې د جمعې ورځې د یفتل ولسوالۍ د برید یو شمېر عاملان یې نیولي دي. په همدې ویډیو کې ماشومان هم د نیول شویو کسانو په منځ کې ښکاري، خو طالبانو د هغوی د هویت، عمر او په برید کې د احتمالي رول په اړه کوم وضاحت نه دی ورکړی.
تر اوسه د طالبانو ادعاوې او د نیول شویو کسانو هویت په خپلواکه توګه نه دي تایید شوي.
په همدې حال کې، په تاجیکستان کې د افغانستان سفیر ظاهر اغبر هم د یفتل د وروستیو تحولاتو په غبرګون کې د طالبانو پر ضد د خلکو د مقاومت ستاینه کړې او دا یې په بدخشان او افغانستان کې د نوي پړاو پیل بللی دی.
