سپینې ماڼۍ د هغو اندېښنو په غبرګون کې چې د ایران پر پلونو او نورو زیربناوو د امریکا له بریدونو وروسته د احتمالي جنګي جرمونو په اړه راپورته شوې، ویلي چې د امریکا پوځ یوازې پوځي هدفونه او له پوځي فعالیتونو سره تړلې لوژستیکي زیربناوې په نښه کړې دي.
د سپینې ماڼۍ ویاندې انا کلي ویلي، واشنګټن ادعا کوي چې ایران تر ډېره په هرمز تنګي کې ملکي بېړۍ په نښه کړې او همدارنګه یې پر ځینو هغو ګاونډیو هېوادونو بریدونه کړي چې په دې شخړه کې یې هېڅ رول نه درلود.
د هغې په وینا، ډونالډ ټرمپ د امریکا مرکزي قوماندانۍ (سینټکام) ته امر کړی چې د ورته بریدونو د ترسره کولو لپاره د ایران وړتیا کمه کړي او د ایران حکومت د دغو اقداماتو په تړاو حسابورکوونکی کړي.
د سپینې ماڼۍ دغه څرګندونې داسې مهال کېږي چې د ایران او امریکا ترمنځ د وروستیو نښتو د بشري او حقوقي پایلو په اړه اندېښنې لا هم دوام لري.
تر اوسه د واشنګټن هغه ادعاوې، چې ایران یې پر ملکي بېړیو او ځینو ګاونډیو هېوادونو د بریدونو په ترسره کولو تورن کړی، او همدارنګه د امریکا د بریدونو د هدفونو په اړه رسمي څرګندونې، په خپلواکه توګه نه دي تایید شوې.
