د بدخشان ولایت د یفتل پایین ولسوالۍ د سپاهیان میهن جبهې له برید وروسته، طالبانو د خپل پوځ لوی درستیز فصیحالدین فطرت د عملیاتو د رهبرۍ لپاره دغه ولایت ته استولی دی.
فصیحالدین فطرت د جمعې په ورځ په بدخشان کې وویل، طالبان د هماغې ورځې له سهاره د برید له پلان څخه خبر شوي وو او د دغو معلوماتو له ترلاسه کولو وروسته نوموړی له کابل څخه بدخشان ته تللی او د عملیاتو مشري یې په غاړه اخیستې ده.
هغه ادعا وکړه چې طالب ځواکونو برید شنډ کړی او بریدګرو ته یې اجازه نه ده ورکړې چې خپلو موخو ته ورسېږي. فطرت بریدګر «مفسدین» او «اغتشاشګر» وبلل او ادعا یې وکړه چې د هغوی «اکثریت» نیول شوي او پاتې کسان هم تر تعقیب لاندې دي، خو د دغو ادعاوو لپاره یې کوم شواهد وړاندې نه کړل. هغه ټینګار وکړ چې د بدخشان امنیتي وضعیت د طالبانو تر کنټرول لاندې دی.
په مقابل کې، د «سپاهیان میهن» جبهې د برید مسؤلیت منلی او ویلي یې دي چې ځواکونو یې د څو ساعتونو لپاره د یفتل پایین ولسوالۍ ودانۍ تر خپل کنټرول لاندې ساتلې وه. ځايي سرچینو هم افغانستان انټرنشنل ته تایید کړې چې د ولسوالۍ مرکز د څو ساعتونو لپاره د طالبانو له کنټرول څخه وتلی و.
ځايي سرچینې وایي، طالبانو وروسته له هغې چې له فیضآباد څخه یې مرستندویه ځواکونه سیمې ته واستول، په یفتل پایین ولسوالۍ کې یې پراخ کور په کور تلاشي عملیات پیل کړل او یو شمېر اوسېدونکي او د طالبانو ځینې محلي غړي یې ونیول.
یفتل پایین ولسوالۍ د بدخشان د مرکز فیضآباد ښار ته نږدې پرته ده، او د دې ولسوالۍ د مرکز څو ساعته د مخالفو وسلهوالو له لوري نیول کېدل د وروستیو میاشتو په ترڅ کې په بدخشان کې د طالبانو لپاره له مهمو امنیتي ننګونو څخه بلل کېږي.
