د بدخشان ولایت د یفتل پایین ولسوالۍ د سپاهیان میهن جبهې له برید وروسته، طالبانو د دې ولسوالۍ یو شمېر اوسېدونکي او د خپلو محلي ځواکونو یو شمېر غړي نیولي دي. د طالبانو د بدخشان امنیه قوماندانۍ دغه نیونې تایید کړې او ویلي یې دي چې د برید د عاملانو د پېژندلو او نیولو عملیات لا هم دوام لري.
د ځايي سرچینو په وینا، دغه نیونې د جمعې سهار له برید وروسته د طالبانو د پلټنیزو عملیاتو په ترڅ کې ترسره شوې دي.
سپاهیان میهن جبهې ادعا کړې چې په دې برید کې یې طالبان بېوسلې کړي، د څو ساعتونو لپاره یې د یفتل پایین ولسوالۍ کنټرول په لاس کې اخیستی او د شا تګ پر مهال یې د طالبانو پوځي تجهیزات هم له ځان سره وړي دي.
ځايي سرچینو افغانستان انټرنشنل ته ویلي، طالبانو د مرستندویه ځواکونو له رسېدو وروسته په ولسوالۍ کې کور په کور د تلاشیو عملیات پیل کړل او یو شمېر اوسېدونکي او همدارنګه د خپلو محلي ځواکونو غړي یې نیولي دي. د سرچینو په وینا، د نیول شویو کسانو په منځ کې ملکي وګړي هم شامل دي.
د طالبانو د محلي ځواکونو د نیولو رسمي لامل تر اوسه نه دی اعلان شوی، خو ځینې سرچینې اټکل کوي چې هغوی ښايي د بریدګرو سره د احتمالي همکارۍ یا د برید د مخنیوي په برخه کې د غفلت په شک نیول شوي وي.
همدارنګه، هغه انځورونه چې افغانستان انټرنشنل ترلاسه کړي، د طالبانو په بند کې یو شمېر کسان او د یفتل ولسوالۍ پر ودانۍ د سپاهیان میهن جبهې د بیرغ پورته کېدل ښيي. افغانستان انټرنشنل ویلي چې د دغو انځورونو کرهوالی یې تایید کړی، خو د نیول شویو کسانو هویت او د طالبانو ادعاوې یې په خپلواکه توګه نه دي تایید کړي.
