د اسلامي همکاریو سازمان د ښځو چارو وزیرانو په نهم کنفرانس کې د سعودي عربستان د پلاوي مشرې میمونه الخلیل له غړو هېوادونو وغوښتل چې د عملي اقداماتو له لارې د ښځو د پیاوړتیا او په کورنۍ او ټولنه کې د هغوی د پراخ ګډون لپاره زمینه برابره کړي.
الخلیل، چې د سعودي عربستان د کورنیو چارو شورا سرمنشي هم ده، د اقتصادي او ټولنیزې پراختیا او د کورنۍ د بنسټ په پیاوړتیا کې د ښځو پر مهم رول ټینګار وکړ. هغې وویل، د اسلامي هېوادونو د ښځو د وضعیت د ښه والي لپاره بېلابېل نوښتونه وړاندې شوي او هیله یې څرګنده کړه چې دغه وړاندیزونه به عملي بڼه خپله کړي.
هغې د غونډې د راپورونو په حواله وویل، د اسلامي همکاریو سازمان غړو هېوادونو د ښځو د پیاوړتیا په برخه کې یو شمېر پرمختګونه کړي، خو د ټاکل شویو هدفونو د ترلاسه کولو لپاره لا هم نورو عملي پروګرامونو او اقداماتو ته اړتیا ده.
د سعودي پلاوي مشرې زیاته کړه، اسلامي هېوادونه باید خپلې هڅې زیاتې کړي، څو ښځې په کورنۍ او ټولنه کې د ګډون لپاره له لا ډېرو فرصتونو برخمنې شي.
د نوموړې څرګندونې په داسې حال کې کېږي چې د سعودي عربستان د بشري سرچینو او ټولنیزې پراختیا وزارت مخکې اعلان کړی و، د دغه هېواد د کار په بازار کې د ښځو د ګډون کچه له ۲۰۱۷ کال کې شاوخوا ۱۷ سلنې څخه په وروستیو کلونو کې نږدې ۳۵ سلنې ته لوړه شوې ده.
دا خبرې همدارنګه په داسې وخت کې مطرح کېږي چې د افغانستان د ښځو وضعیت او د طالبانو له لوري د زدهکړو، کار او ټولنیز حضور پر وړاندې لګېدلي محدودیتونه د اسلامي همکاریو سازمان د ښځو چارو وزیرانو د نهم کنفرانس له مهمو موضوعاتو څخه ګڼل کېږي.
