د طالبانو د امر بالمعروف او نهی عن المنکر وزیر محمد خالد حنفي ادعا کړې چې د ازبکستان په تاریخي ښارونو سمرقند، بخارا او ترمذ کې، چې د اسلامي تمدن له مهمو مرکزونو او د امام بخاري او امام ترمذي په څېر د سترو اسلامي عالمانو ټاټوبی ګڼل کېږي، اسلام نن «یوازې په ژبو پاتې دی.»
د طالبانو د امر بالمعروف وزارت ویاند د جمعې په ورځ د حنفي د وینا متن خپور کړ. دغه څرګندونې په داسې حال کې کېږي چې سمرقند، بخارا او ترمذ د ازبکستان په قلمرو کې موقعیت لري؛ هغه هېواد چې په وروستیو کلونو کې یې له طالبانو سره خپلې سیاسي او اقتصادي اړیکې پراخې کړې دي.
حنفي د خپلو خبرو په بله برخه کې وویل، په افغانستان کې د ښځو او نجونو د واده اړوند حقونه لا هم په ځینو مواردو کې تر پښو لاندې کېږي او اجباري ودونه لا هم شتون لري.
د طالبانو د وزیر څرګندونې داسې مهال مطرح کېږي چې خپله طالبان د ښځو او نجونو پر زدهکړو، کار او ټولنیز حضور د پراخو محدودیتونو له امله د ملګرو ملتونو، د بشري حقونو د سازمانونو او ګڼو هېوادونو له سختو نیوکو سره مخ دي.
له بلې خوا، ازبکستان، سره له دې چې یو سکولر سیاسي نظام لري، خپلو وګړو ته د افغانستان د اوسني وضعیت په پرتله پراخې ټولنیزې او فردي آزادۍ ورکوي او دیني قوانین په اجباري ډول نه تطبیقوي.
تر دې دمه د ازبکستان حکومت د محمد خالد حنفي د دغو څرګندونو په اړه رسمي غبرګون نه دی ښودلی. د شنونکو په باور، که تاشکند دې څرګندونو ته رسمي ځواب ورکړي، دا موضوع ښايي د طالبانو او ازبکستان ترمنځ د اړیکو په سیاسي فضا کې هم اغېز ولري.
