د امریکا ولسمشر ډونالډ ټرمپ د ناټو د مشرانو غونډې پر مهال د خپل هېواد د خزانې وزیر ته امر کړی چې له هسپانیې سره د سوداګریزو اړیکو د کمولو او محدودولو بهیر پیل کړي. نوموړي مادرید د ناټو په چوکاټ کې «نامناسب شریک» وباله او د دې پرېکړې د ژر عملي کېدو غوښتنه یې وکړه.
ټرمپ یو ځل بیا د ناټو په ائتلاف کې د هسپانیې پر دریځ نیوکه وکړه او ویې ویل، دغه هېواد نه یوازې د دفاعي لګښتونو لپاره د ناخالص کورني تولید د پنځه سلنې نوي هدف ملاتړ نه دی کړی، بلکې د ایران پر ضد د امریکا په پوځي عملیاتو کې یې هم له واشنګټن سره همکاري نه ده کړې.
د امریکا ولسمشر وویل: «هسپانیه له هېڅ شي سره موافقه نه کوي او نور هېوادونه باید د هغې بار پر اوږو وانخلي.» هغه ټینګار وکړ چې امریکا باید خپلې اقتصادي اړیکې له هسپانیې سره راکمې کړي.
دا څرګندونې په داسې حال کې کېږي چې امریکا په هسپانیه کې دوه مهمې پوځي اډې، د روتا سمندري اډه او د مورون هوايي اډه، کاروي. دغه اډې د اروپا، مدیترانې او منځني ختیځ په پوځي او لوژستیکي عملیاتو کې مهم رول لري.
په همدې وخت کې، ځینې راپورونه وایي د امریکا دفاع وزارت د هغو ناټو غړو پر وړاندې د فشار د زیاتولو پر لارو چارو غور کوي چې د واشنګټن په اند یې د ایران اړوند عملیاتو کې کافي همکاري نه ده کړې.
همدارنګه، د هسپانیې د غړیتوب د احتمالي ځنډېدو په اړه هم ځینې راپورونه خپاره شوي، خو تر اوسه نه د امریکا کوم رسمي چارواکي او نه هم ناټو دا ادعا تایید کړې ده. له همدې امله، دا موضوع لا هم د نا تایید شویو راپورونو په کچه پاتې ده.
