ملګرو ملتونو د پاراګوای د یوې سناتورې له لوري د فرانسې د فوټبال ملي لوبډلې د کپتان کیلیان امباپه پر ضد نژادپالې څرګندونې «شرموونکې» بللې او خبرداری یې ورکړی چې نژادپالنه په فوټبال کې نور یوه استثنايي پېښه نه ده، بلکې په نړیوال ورزش کې پر یوې پراخې ستونزې بدله شوې ده.
د ملګرو ملتونو د بشري حقونو دفتر د سېشنبې په ورځ، د چنګاښ په ۱۶مه، د پاراګوای د سناتورې سلېستې آماریا د څرګندونو په غبرګون کې وویل، د ۲۰۲۶ نړیوال جام پر مهال د نژادپالنې د پېښو راپورونه ښيي چې دا ستونزه لا هم د نړۍ د فوټبال له جدي ننګونو څخه ده.
د فرانسې خبري اژانس د راپور له مخې، آماریا د فرانسې او پاراګوای د یو اتم پړاو له لوبې وروسته کیلیان امباپه «یو استعمارځپلی کامرونی چې ځان فرانسوی معرفي کوي» وباله او د سپکاوي په ژبه یې شخصي بریدونه پرې وکړل. هغې همدارنګه ادعا وکړه چې امباپه د لوبې پر مهال «له وېرې رپېده».
د ملګرو ملتونو د بشري حقونو دفتر ټینګار وکړ چې دولتي چارواکي او سیاسي شخصیتونه ځانګړی مسوولیت لري څو د نژادپالنې، تبعیض او کرکې د خپرېدو مخه ونیسي، نه دا چې د خپلو څرګندونو له لارې ورته لمن ووهي.
د دغو څرګندونو له خپرېدو وروسته، د پاراګوای د بهرنیو چارو وزارت، د فیفا رئیس جیاني اینفانتینو او د فرانسې ولسمشر امانویل مکرون هم د سناتورې خبرې وغندلې. کیلیان امباپه هم په خپل غبرګون کې وویل چې سلېستې آماریا «د خپلې دندې وړ نه ده.»
د امباپه دا قضیه یو ځل بیا په نړیوال فوټبال کې د نژادپالنې موضوع د بحثونو سر ته راوستې ده. د ملګرو ملتونو وروستی دریځ ښيي چې نړیوال بنسټونه د نژادپالنې پر وړاندې د لا جدي او همغږو اقداماتو غوښتنه کوي، ځکه د فوټبال د نړیوال محبوبیت ترڅنګ، د تبعیضي چلند دوام د دې ورزش اعتبار هم اغېزمنولای شي.
