د فرانسې په ختیځ کې ناپېژاندو غلو د لالیک موزیم ته د ننوتلو وروسته شاوخوا شل قیمتي ګاڼې، چې ارزښت یې نږدې څلور میلیونه یورو اټکل شوی، غلا کړې دي. دا پېښه یو ځل بیا په فرانسه کې د موزیمونو او د فرهنګي میراث د ساتنې د امنیت په اړه اندېښنې زیاتوي.
د فرانسوي رسنیو د راپورونو له مخې، غلو د یکشنبې سهار شاوخوا پنځه نیمې بجې لومړی هڅه وکړه د موزیم له اصلي دروازې دننه شي، خو د خطر زنګ له فعالېدو وروسته بریالي نه شول. وروسته هغوی د بېړني وتلو له یوې دروازې ودانۍ ته ننوتل، د ګاڼو د نندارتون شپږ ویترینونه یې مات کړل او د امنیتي ځواکونو تر رسېدو مخکې له سیمې وتښتېدل.
د غلا له پېښې سره لومړی د موزیم یوه خدماتي کارکوونکي مخ شو او سمدستي یې پولیس خبر کړل. د فرانسې څارنوالۍ د پېښې په اړه رسمي پلټنې پیل کړې او پولیس د امنیتي کامرو انځورونه او نور شواهد ارزوي. تر اوسه د شکمنو کسانو د پېژندنې یا نیولو په اړه رسمي معلومات نه دي خپاره شوي.
لالیک موزیم د فرانسې او جرمني پولې ته نږدې د وینګن-سور-مودر په ښار کې موقعیت لري او د نامتو فرانسوي هنرمند او ګاڼهجوړوونکي رنه لالیک د ښیښې، کریستال او قیمتي ګاڼو ارزښتمن اثار پکې ساتل کېږي. دا موزیم د فرانسې د تزئیني هنرونو له مهمو مرکزونو څخه ګڼل کېږي.
دا غلا په داسې حال کې شوې چې په تېرو میاشتو کې د فرانسې په یو شمېر موزیمونو کې ورته لویې غلاوې هم ثبت شوې دي. د لوور موزیم د شاهي ګاڼو او د پاریس د طبیعي تاریخ له موزیم څخه د سرو زرو د غلا پېښو هم د فرهنګي میراث د ساتنې په اړه جدي پوښتنې راپورته کړې وې.
د دغو پرلهپسې پېښو تکرار ښيي چې د فرانسې په ځینو موزیمونو کې امنیتي تدابیر له نویو ګواښونو سره د مقابلې لپاره تر فشار لاندې دي. تمه کېږي روانې پلټنې نه یوازې د غلو د پېژندنې لامل شي، بلکې د ارزښتناکو تاریخي او هنري اثارو د ساتنې په تګلارو کې هم بدلونونه رامنځته کړي.
