د طالبانو د کورنیو چارو وزارت اعلان کړی چې د دې ډلې د مشر هبتالله آخندزاده په حکم، د «ترافیکو پولیس» نوم «شرطه عبور او مرور» ته بدل شوی دی.
دغه بدلون د دوشنبې په ورځ، د چنګاښ په اتمه، په خپره شوې آګاهۍ کې د لومړي ځل لپاره په رسمي ډول عملي شوی دی. په همدې آګاهۍ کې د شپې پر مهال پر لویو لارو د هغو ټراکټورونو، ریکشاګانو او نورو نقلیه وسایطو تګ راتګ هم منع اعلان شوی چې څراغونه نه لري.
طالبانو تر اوسه د دې بدلون د علت په اړه رسمي وضاحت نه دی ورکړی، خو سرچینې وایي دا اقدام د هبتالله آخندزاده د هغې تګلارې برخه ده چې غواړي ځینې اصطلاحات په هغو کلمو بدل کړي چې د هغه په باور «اسلامي صبغه» ولري.
طالبانو تر دې وړاندې هم د «سرحدي پولیس» نوم «شرطه سرحدي» ته بدل کړی او د یو شمېر دولتي ادارو له نومونو یې د «ملي» کلمه لرې کړې ده. د رسمي اسنادو له مخې، «د احصائیې او معلوماتو ملي اداره» په «د احصائیې او معلوماتو عمومي اداره» او «د ازموینو ملي اداره» په «د ازموینو عمومي اداره» بدلې شوې دي.
د تلویزیون نیمروز سرچینې هم وایي چې هبتالله آخندزاده هڅه کوي د «ملي تلویزیون» نوم «د شریعت غږ» ته بدل کړي، خو دا موضوع تر اوسه د طالبانو له خوا په رسمي ډول نه ده تایید شوې.
